Tang shu poi ka samoi elekshon khamtam san ne hynriew bnai ban poi ka jingthep vote la shu sawa shane shatai ba ka don ka jingsuba bamsap ha ka jingpyntrei ïa ka skim um, skim surok, skim tei jingtei ba harukom kaba bunsien ka pynlong ïa ki paidbah ban shu ngeit beit ba ka don shisha kata ka jingbamsap ha kata ka jingpyntrei. Hynrei lada kren pat ïa ka jingshisha, kitei baroh ki jingïakren ki shu kut beit tang ha ka suba bad hana ba ka don kum kata kata bad kane ka la nang pur tad haduh ba kan da pynjot thiaw ïa ka burom jong uto u kyrtong ne u nongmihkhmat uba kynduh ïa katei ka kam.
Teng teng lada ïa kren ïa kata ka ishu bamsap, baroh kin ong beit ba dei tang ki nongmihkhmat lane kito ki nongïalam jong ki kyrtong ne MLA bad ruh ki Myntri sorkar ba don ha ka shuki pynban katei kam long satia kumta kumba la mutdur da baroh. Ha kaba kut dei ban pyrkhat arsien ïano ban kynnoh bad ïano ban kynthoh da kitei ki kyntien. Ha ka jingshisha hi, katno ngut tam eh kiban sngewthuh ïa ka jingmut jong ka kam bamsap la ka long ha ka jylla ne wat ha ka ri? Bunsien la ju ïohsngew ba ki paidbah na ka por sha ka por ki ju ïakren shaphang kata ka kam bamsap bampong la ka long ha ki shnong ki thaw, ha ki District ne wat ha ka jylla ne ka ri, hynrei bunsien ka jingïakren ka la shu kut tang ha ka lyer bad kim sngewthuh pat ïa ka jingmut ba shisha jong ka kam bamsap.
Haba kren shaphang ka kam bamsap bunsien ruh ka ju mih kata ka jingkynnoh tang ïa ki nongmihkhmat (MLA &MDC) bad ïa ki ophisar sorkar, hynrei haba bishar bniah pat ïa kane ka kam bamsap mynta ka la rung lut ha baroh ki bynta kata naduh ki kam shnong kam thaw, ki kam ing kam sem, kam seng bad kiwei kiwei, kaba la pyntroiñ shisha ïa longbriew manbriew ha ka jylla bad ka thaiñ hi baroh kawei.
Katei ka jingsahdien hi kadei namar ka don ka daw tynrai, kata ka bamsap ha ki bun rukom, da ka pisa, da ki kam, da ki jingïa pyrshah bad kiwei kiwei kiba long thik kum ki thliem kiba kjit bad bam klop ïa ka hok jong u paidbah ba ka sorkar jylla ne sorkar pdeng ka la ju ïarap kyrpang lyngba ki kam pynroi jong u paidbah.
Sngew sangsot ban phai sha ki jaka nongkyndong kiba hap mad tang da ki jingeh suda ha ka jingim kata naduh ka jingduna ki umbam umdih, ki lynti ki synkien, ka koit ka khiah bad kiwei kiwei pat ki kam pynroi ha kaba la ju ïa kynnoh ba dei namar ba don kata ka jingbamsap ïa ka hok u paidbah. Ha kawei ka bynta, ka jingkren ba sahdien ki kam pynroi ka dei na ka daw ka jingdon jong ka kam bamsap ka long kaba don nongrim, hynrei ban ong pat ba ka dei 100 persen tang na ka daw ka bamsap ka dei ka kam ka bym lah ban pdiang namar bunsien wat ki paidbah ruh ki ngop ha ka kam bamsap ha kaba kim ju pyrkhat ïa lade ba ki bamsap hynrei ki kloi ban kdew pat ïa ki nongmihkmat bad ki ophisar sorkar.
Lah ruh ban kdew shai hangne ba ka kam bamsap mynta ka la rung ha man la uwei pa uwei u briew khamtam ha ka por elekshon ba ki paidbah ki ju biej ïa ki sbai rupa kaba ki ju ïoh tang ha ka shi khyllipmat jong ka por elekshon hynrei ynda la kut katei ka aïom ksiar pat ki ju lynñiar ba duna kane katai kaba dei na ka jingleh bakla khlem da bishar bniah shuwa ban kner ïa ki kti.
Hap ruh ban kynnoh ba ka kam bam sap mynta ka la rung ha man la uwei pa uwei u briew kaba ngim da donkam ban shu kynnoh ne ban pynkitpap tang ïa kiwei bad lada ki paidbah ki sngewthuhshisha ba ka kam bam sap ka ktah ïa ka imlang ka sahlang bad ka roi ka par upaidbah ka la dei ka por ba ki hap ban ïa pyrkhat arsien na ka bynta ban shim ïa ka jingkitkhlieh hynrei ki dei ban pyrkhat ba ïa katei ka kam donkam ban rat dyngkhong shuwa ïa lade shimet bad nangta sa peit ïa kiwei.
Kumba ong ka ktien riewstad, “ wat peit ïa u thngiat kiwei, hynrei peit shuwa ïa u khung…..” bad dei hangta ngin sa lah ban pynduh pyndam bad ban pynduh jait ïa ka kam bamsap bampong ha ka imlang ka sahlang, ha ka ri ka raid bad ha ka jylla bad ka ri hi baroh kawei.
Ym lah ruh ban len ba wat ha kane ka juk jong ka jingbamsap, hynrei dang don pat kiba khuid bad kiba kwah shisha banpynduh jait ïa ka kam bamsap ha kaba la donkam ban ai ruh ban ai ïa kajingïaroh. Ka jingkylli pat ka dang mih shuh shuh ba la jin ba man la uwei pa uwei u nongshong shnong u khuid ka mynsiem bad u don ïa ka jingïohi jngai na ka bynta ka bha ka miat, ka roi ka par jong ki paidbah, kam don jingeh satia ban pynduh jait ïa ki kam bamsap kiba long ki kruiñ kiba ktah ïa ka kam ïap kam im jong ki paidbah.
