Da ki khun sniang sam ka sorkar sha ki longïing ba duk na ka skim Rural Backyard Piggery Scheme ha Ri-Bhoi

Nongpoh, Nailar 31: Shibynta ban kyntiew ïaka ioh ka kot ki paidbah ka sorkar lyngba ka tnad Animal Husbandry & Veterinary Department mynta ka sngi kala sam da ki khun sñiang sha ki hajar ngut ki nongri sñiang ka thaiñ Ri-Bhoi naka bynta ban kyntiew ïaka ioh ka kot jong ki khamtam ki longiing ba duk sha ki shnong nongkyndong kaba dei ruh ka thong jong ka sorkar ban ïarap bad kyntiew ïaki nongri sñiang.
Ïa kitei ki khun sñiang la sam ruh sha ki longiing ba duk haka jingïalang kaba la long mynta ka sngi ha Lumnongrim Byrnihat lyngba ka Rural Backyard Piggery Scheme jong ka National Livestock Mission, ha kaba u Myntri Rangbah ka jylla u Conrad K Sangma u la wan ban shim bynta kum u kongsan haka jingdonlang u Bah Sosthenes Sohtun MLA ka Jirang, Bah Jason S Mawlong MLA ka Umsning, Dr. Manjunatha C, Secretary AH and Veterinary Department, u GHP Raju Principal Secretary AH and Veterinary Department, Dr A Laloo Director, u Arpit Upadhaya Deputy Commissioner ka Ri-Bhoi District bad kiwei kiwei ki heh ophisar ryngkat bad hajar ngut ki paidbah nongioh jingmyntoi.
Haba kren ha katei ka sngi naka liang u Myntri Rangbah u la pynpaw ba kane ka dei ka thong jong ka sorkar ban ïarap ïaki longiing kiba duk tasam ba kin ioh ïaki khun sñiang naka bynta ban ri bad pynroi ïaki ha kaba ka sorkar kala mang kumba 4 tylli ki khun sñiang haka shi iing ba ki lah pat ban pynroi bad die ïaki khun sñiang naka bynta ka jingmyntoi bad khamtam ban kyntiew ïaka ioh ka kot jong ki longiing ba duk haki thaiñ nongkyndong.
U la ong ruh ba bun naki longiing naduh ki sorkar bala leit noh kim don ïaki skhim kyrpang naka bynta ban ïarap ïaki nongrep kumba bun naki longiing haka jylla kidei kiba wan naki longiing ba duk bad kiba im naka rep ka riang, hynrei ka sorkar MDA kala lum la lang ïaki nongrep haka jylla ha kine ki 4 snem ha baroh ki liang ka kam rep kam riang bad ri jingri bad pynmih ruh ïaki skhim kyrpang bapher kum ka FOCUS, Piggery Mission, Lakadong Mission bad kiwei kiwei ban kyntiew bad ïarap ïaki nongrep.
Naka liang u Bah Sothenes Sohtun bad u Bah Jason S Mawlong haba kren ha katei ka sngi kila ai ka jingïaroh ïaka sorkar MDA hapoh ka jingïalam jong u Conrad Sangma kaba la wanrah shibun ki kam pynroi khamtam ban kyntiew ïaki nongrep bad ki nongri jingri haka jylla kum ka jingplie lad ïaki longiing ba duk haka jylla ba kin kiew shaphrang haka ioh ka kot.