Shillong, Nailar 28 : Ka sorkar Meghalaya Democratic Alliance (MDA) hapoh ka jingïalam jongka National People’s Party (NPP) ka la rai ba da lei lei ruh yn ym shah plie Casino ha Meghalaya hadien ba la mih ki jingpyrshah ba jur na kiba bun ki Seng, ki Dorbar Shnong, Raid, Hima, ki nongïalam niam bapher bapher bad wat ki paidbah hi ruh.
“ Ka sorkar MDA ka la dep rai ban ym shah plie Casino ha ka jylla namar ka
ïoh sngew bad ïohi ïa ki jingpyrshah na kiba bun ki liang” ong u Symbud Myntri Rangbah bah Prestone Tynsong haba ïakren bad ki nongthoh khubor.
Lah ban pynkynmaw dang ha ka 25 tarik mynta u bnai la seng ïa ka Joint Action Committee Against Casino (JACAC) ban pyrshah ïa ka jingthmu plie ïa ka Casino. Nalor kata wat ka Synjuk Ki Rangbah Shnong (SKRS) Ri Bhoi ruh ka la dep pynpaw ïa ka jingpyrshah jur.
Hynrei na ka liang u Symbud Myntri Rangbah u la ong “Ka sorkar hi kam don kano kano ka jingthmu ban plie ïa ka Casino ha ka jylla namar wat tang ka kyndon aiñ ruh ym pat don bad lada dei ba thmu ban plie la dei ban thaw shwa da ka Aiñ. Hynrei kaei kaba ngi ïohi ka long tang ha ki kot khubor ba la sdang tei ïa kata ka Casino ha Ri Bhoi bad ka jingtrei ka la ïaid shaid shaid shakhmat, ïa kane ngim lah ban ong ïoh dei ka jong ki riew shimet tangba wat la katta ruh kin ym lah ban plie katba ym pat don ka aiñ bad ka sorkar kan ym shah hi ruh haba ngi la ïohi ïa ki jingpyrshah jur na kiba bun balang” ong u bah Prestone.
U la ong shuh shuh ïoh lehse kitei kiba tei ki dang pyrkhat ba kin sa ïoh jingbit na ka sorkar hynrei em kam long kumta, da lei lei ruh ka sorkar kan ym shah namar ïa kano kano kaba pyrshah ki paidbah ka sorkar kam kwah ban ïaleh pyrshah. Kumba kane ka sorkar ka dei ka jong ki paidbah bad kat kaba ki mat ba sahteng jong ki paidbah ruh ka la nang ïai pyndep kum ka jingpynkhreh pynkynriah ïa ka Them Metor, ka jingpynbeit ïa pud u sam bad ka Assam, ka jingbud dien ïa ka ILP bad kiwei kiwei kumta ruh halor kane ruh ka sorkar kan ym shah plie haba bun ki jingpyrshah, ong biang u Symbud Myntri Rangbah.
U la ong “ïa mynta hi ka sorkar kam don jingthmu hynrei lada jia ba don kiba kwah plie hadien habud ruh, ka sorkar kan hap ban pan jingmut lang na ki Dorbar Shnong, ki Seng Bhalang, ki Raid, ki Hima, ki Seng Niam bad ter ter, kan ym ïaid lait da lei lei ruh ïa kine. Namar tang lada ïa mynjur lang ba yn sa thaw ïa kata ka Aiñ bad ban sa lah plie da kino kino ki kynhun ne riew shimet ruh. Hynrei ïa mynta hi ka sorkar ka kwah ban pynshai kdar ba kam don kano kano ka jingthmu ban plie ne shah plie ïa ka Casino ha ka jylla” Pynkut u Symbud Myntri Rangbah.
