Shillong, Nailar 28 : Ka jingpynkhyllem tuh bad khaïi beaiñ ïa ki dieng sawdong na ki khlaw sorkar ka la nangjur nangjur ha ri lum Garo ha kaba bun ki jaka ki la syllen bad ïa kine ki dieng la khaïi beaiñ beit na Garo Hills sha Assam hynrei kaba lyngngoh ka long wat la ki seng bhalang na ka por sha ka por ki ïoh bat ïa kine ki trok ba kit dieng sawdong beaiñ na ka liang ka sorkar pat kam leh ei ei.
Kum kawei na ki seng kaba peitngor bha ïa kane ka jingkhaïi tuh ïa ki dieng na ki khlaw sorkar ka AYWO, dang ha kine ki khyndiat sngi hadien ba ki la ïoh ka jingujor na ki riew paidbah ïa kane ka jingkit tuh ïa ki dieng sawdong ka la leit hiar sha ka Damalgre Mellim bad ïoh ban bat ïa kawei ka trok Bolero Pickup ML 08 G 3739 kaba la kit shitrok ki dieng sawdong. Kane ka trok ka dang mut ban leit pynhap ïa kine ki dieng sawdong sha Assam. Haba la talasi bad tohkit bniah la lap ba ym don kot don sla satia la ka dei na ka tnad kam khlaw ka sorkar jylla ne na ka tnad kam khlaw ka GHADC.
Kumta hadien ba la bat la aiti ïa kane ka trok Bolero sha ka tnad kam khlaw ka GHADC ha ka jingïadon lang u Range Officer bad la shimti ïa kane ka trok da u Chief Forest Officer, GHADC, Tura. Kane ka jingkhaïi tuh ïaki dieng sawdong ka jur bha ha West bad South West Garo Hills kum ha Mellim, Amindagre, Gambegre, Damalgre, Rangsakhona, Maljenggre, Nogapara, Gongglanggre, Boldoka, Kalchengpara, Mangchim kumjuh ruh ha Makdangra, Dengasi bad ha kiwei kiwei ki jaka. Ka jingkhaïi ka long wat ha ka por mynsngi mynshai ruh hynrei ym don ba bat ne kem ïa ki trok bad ki ïaid mon beit khlem jingsalia.
Ka Seng AYWO ka la pynpaw ba ki don bun ki aiñ ba la pynskhem da ka sorkar pdeng bad sorkar jylla ban ïada ïa ki khlaw ki btap bad ïa ka mariang hynrei ka jingpyntreikam pat ïa ki ka synjor palat ha kaba kat kane ka jingkhaïi tuh ïaki dieng na khlaw sorkar sha Assam ruh ym don ba kem ne bat ïa kine ki trok bad ka daw ka long ba ka dei ka jingïadonkti lang hi jong ki heh sorkar, kynnoh ka AYWO.
Shuh shuh ka seng ka la pynpaw ba kane ka jingpom pathar ïaki dieng ym tang ba ka ktah ïa ka mariang bad wanrah ka jingsyllen ïaki khlaw ki btap hynrei kan wanrah ruh sa ka jingtwa ka khyndew bad jingbymsei soh shuh ka jaka ban rep ban riang. Nalor kata kan warnah ruh wat ïa ka jingkylla ka suiñbneng.
Kumta na ka liang ka seng ka dawa jur ïa ki bor ba dei peit ba kin shim khia ban ïada ïa kane ka jingkhaïi tuh ïa ki dieng bad kem ïa kiba donkti bad pynshitom ïa ki kat kum ki kyndon aiñ.
