Shillong, Nailar, 27: Ka People’s Democratic Front (PDF) ka la pynbna ba u samla Auspicious Lyngdoh Mawphlang uba dei ruh u General Secretary ka Party un dei u kyrtong ha ka elekshon sha ka Ïingdorbar Thawaiñ ka Jylla ka ban sa long ha u snem 2023.
U President jong ka PDF, u Bah Gavin M. Mylliem uba dei ruh u MLA u la pynbna ïa ka kyrteng jong u Bah Auspicious ha ka jingïalang paidbah kaba la long ha Mawphlang ha ka sngi Saitjaiñ bad ha kaba la pynskhem ruh ïa ki nongkitkam jong ka PDF Zonal Committee Mawphlang Constituency ki ban trei shit rhem na ka bynta ban poi sha ka thong.
Une u samla u dei u khun jong ka Kong Tioliam Lyngdoh Mawphlang bad u Bah Aiborsing Rajee kiba shong basah ha ka shnong Mawphlang. U dei u samla uba la pyndep ïa ka jingpule ha ka kyrdan MSc Environmental Science na ka skulbah North Eastern Hills University (NEHU), Shillong.
Une u samla u la bat teng ruh u kum u President jong ka North Eastern Hills University Students’ Union (NEHUSU) (2014-2015) ha shwa ba un shimti ïa ka kam General Secretary jong ka PDF.
U la ïa aireng nyngkong ha ka elekshon MDC jong ka Khasi Hills Autonomous District Council na Mawphlang-Diengiei Constituency ha snem 2019 bad shah rem tang da khyndiat spah vote.
U ladei u wei napdeng ki samla uba la mih khmat ha shwa election MLA 2018 ban pynsngewthuh ïa ki paidbah ïa ka rukom jied nongmihkhmat lyngba ka Clean Politics Campaign.
Ha kane ka jingïalang, ki nongïalam jong ka PDF, ki la pynpaw ba u samla Auspicious uba la bat ïa ka kam nongïalam shnong u dei shisha u samla uba ïoh bha ïa ka jingshaniah bad ka jingieid na ki riewrangbah, na ki longkmie longkpa bad na ki samla ha ka thaiñ Mawphlang hi baroh kawei.
Ki la pynpaw ba ki donkam ïa u briew uba la biang ka jingnang jingstad, ka burom ka akor bad uba sngewrit kum u samla Auspicious u ban ïa said na ka bynta ka ri bad jaidbynriew bad na ka bynta ka Mawphlang Constituency.
“U dei u samla uba kloi ban ïarap bad ïatreilang ha kino kino ki ban ïa kyntiew ïa imlang sahlang bad u bym ju kyntait ban ïa tyllun lang ha ki jingeh ki paidbah nongshong shnong,” ki la ong.
U Bah Gavin haba kren ha kane ka jingïalang hadien ka jingpynskhem ïa ki nongkitkam ka Zonal Committee u la kyntu ïa ki paidbah ban ailad ïa u samla Auspicious ban mihkhmat na kane ka Constituency khnang ban pynthikna ïa ka jingwan ka jingkylla ym tang ha ka roi ka par hynrei ha ki bynta bapher bapher kiba dei bynta bad u paidbah.
U Vice President jong ka PDF u Bah James Ban Basaïawmoit, uba la pynïaid ïa ka jingïalang u la ong ba um ngeit ba ki briew kiba shong da ki kali kiba kiba lai phew ne saw phew lak kin dang kwah shakri paidbah bad kumta dei ban ailad ïa u samla Auspicious ban long uta u shakri paidbah namar u kham sngewthuh khambha ïa ki paidbah ka thaiñ.
U samla Auspicious haba kren ha kane ka jingïalang, da kaba ai khublei shwa ïa ki kmie ki kpa, ki niakha, ki bahaïing bahasem, u la ong ba u mih mynta ka kynti ban ïakhun ïa ka elekshon namar u la ïaid bad ïohi ïa ka jingeh kiba u paidbah u ïakynduh.
“Nga la rem khyndiat eh ha ka elekshon MDC bad ka dei ka jingkyrshan radbah bad ka jingieid kiba phi ai. Nga la ïai bteng ban ïatreilang kat ha ka bor kaba nga lah bad nangne sha khmat ruh ngin dang ïatrei lang khnang ban kyntiew ïa ka bha ka miat ha ka thaiñ “, u la ong.
U la pynpaw ka jingsngewkhia ba ki don ki Nongmihkhmat ha ka Jylla kiba ym don por ban shah shkor ïa ki jingeh jong ki baduk bad teng teng ki shah khñiot beiñ tang namarba ym don ki nongïalam ki ban ai mynsiem ïa ki.
