Nongpoh, Lber 28: Ka long ka jingkyrkhu kaba khraw ïaki khun samla kiba don ka jingangnud ban dang kiew shaphrang haka kam ïalehkai sports hadien ba ka sorkar jylla haka sien ba nyngkong eh lyngba ka tnad ïalehkai kala pynbna bad pynkhreh ban tei da ka stadium kaba heh tam ha Ri-Bhoi District ban kyntiew ïaka kam ïalehkai sports.
Ïa katei ka stadium yn tei ha madan ïalehkai jong ka shnong Lumnongrim ha Byrnihat hadien ba u Myntri ka tnad ïalehkai sports ka jylla u Bah Banteidor Lyngdoh mynta ka sngi u la leit ban plie ïa u mawnongrim ban tei ïa katei ka stadium kaba paka kaba biang nadong shadong naduh ki jaka shong ki paidbah, ki jingker kynroh bad kumjuh ruh ka jingpynbha ïaka madan ïalehkai bala mang haduh 5.7 klur.
Ha katei ka sngi la sakhi ruh da ka jingdonlang u Bah Sosthenes Sohtun MLA ka Jirang, Bah Victor Ranee MDC, Bah Bibatdor M Syiem Chief Engineer State Sports Council of Meghalaya, Wanphrang Syiem Sirdar ka Elaka Nongpoh, ki ophisar naka tnad ïalehkai ka jylla, ki Rangbah Shnong bad kiwei kiwei ki riew rangbah.
Haba kren ha katei ka sngi kum u kongsan u Bah Banteidor Lyngdoh u la ong ba ka thaiñ Byrnihat kadei kaba la donbok tam ba kala ioh ïa katei ka skhim ban pynbiang ïaka madan bad khamtam ban kyntiew ïaka kam ïalehkai sports haka district kaba long ka jingmyntoi kaba khraw ïaki khun samla ka thaiñ lyngba ka jingtrei shitom jong u MLA ban pynioh ïa katei ka skhim.
U la ong ruh ba kane ka dei ka sien kaba nyngkong eh ha Ri-Bhoi ban ioh ïa katei ka skhim naaka bynta ban pynbha bad kyntiew ïaka kam ïalehkai sports haka district, kumba ki paidbah kila angnud ban ioh ïaka madan ïalehkai kaba paka naka bynta ka jingmyntoi ki khun samla bad khmih lynti ba ka jingpyntrei ïa katei ka project kan sa sdang noh shen ha katei ka jaka.
Naka liang u Bah Sosthenes Sohtun MLA ka Jirang u la pynpaw ka jingsngewkmen kaba khraw bad ai khublei ïa u myntri ka tnad ïalehkai khamtam u Myntri Rangbah ka jylla u Conrad Sangma halor katei ka jingwanrah ïa katei ka skhim ha Byrnihat kaba dei ka jingkyrkhu bad ka jingmyntoi kaba khraw ïaki khun samla ka thaiñ ban dang kyntiew ïaka kam ïalehkai sports.
