Suhsat ki nonghikai SSA bym ïoh tulop la 2 bnai tam, kynnoh ba shukor ka Sorkar

Shillong, Nailar, 24: Ki nonghikai skul SSA kiba don hapoh ka shatri jong ka All Garo Hills SSA School Teachers’ Association (AGHSSASTA) ki la pynpaw ka jingsngew dukha mynsiem namar ka jingbym ïoh tulop mynta la ar bnai tam, kata naduh u bnai Jylliew, 2022 haduh mynta bad kaba la jan kot haduh lai bnai.
Ka Seng ha u kyrwoh ba la phah da u Publicity Secretary u Bunbunbirth Marak ka la ong, ‘dang shen u Symbud Myntri Rangbah Bah Prestone Tynsong u la kular ban pyllait baroh ka tulop ba sahteng jong ki nonghikai skul SSA tang shu ïoh pdiang ïa ka pisa na ka Sorkar Pdeng bad ha kajuh ka por la ïakren ruh ha kaba ïadei bad ka jingpynkiew ïa ka tulop. Hynrei haduh mynta ngim pat ïohi ïa kano kano ka kam ba ka Sorkar kan budien kumba la kular.”
“Ka Seng kam lah shuh ban shu ïai shah kum ïa kine ki jingkular thok. Hato ka Sorkar Pdeng kam pat mang ïa ka pisa na ka bynta ba siew tulop ïa ki nonghikai skul SSA haduh mynta lane hato ka Sorkar MDA ka buh ïa ka pisa ba la mang na ka bynta ka SSA na ka bynta kiwei pat ki jingthmu?” la buh jingkylli ka Seng.
“Ki nonghikai skul SSA ka jylla Meghalaya ki la nang ïakynduh jingeh bad ki don ruh hapdeng ka jingsuhsat ha kane ka jingsynshar jong ka Sorkar MDA namarba ym shym la siew biang por ïa ka tulop jong ki nonghikai SSA kat haduh ba ki la hap ban mih sha surok na ka por sha ka por,” ong u kyrwoh.
“Manla ka por ka jingdkoh ka rukom siew tulop ïa ki nonghikai skul SSA ka la kham jur haba ïa nujor bad ka Sorkar kaba mynshwa. Haduh mynta ym shym la pynkiew wat ïa ka tulop jong ki nonghikai skul SSA. Ym shym la ithuh ïa ki nonghikai skul SSA kum ki nonghikai skul Sorkar ba pura kumba long sha kiwei pat ki jylla. Wat tang shi naïa ka Arrear ruh ym pat siew satia watla ka Sorkar barim ka la pyllait ïa ka Arrear kaba saw bnai,” la ong shuh shuh ka Seng.
Ka Seng ka la ong ruh ba haduh mynta ka Sorkar MDA kam shym la mang pisa ban thied wat ïa ki tiar ai jinghikai (Teaching Learning Material) na ka bynta ki nonghikai skul SSA. Ka Sorkar MDA ka la khate ruh wat ïa ka Maintenance and School Grants kaba ju ai T. 12,500 hynrei mynta la ai sa tang T. 10,000 sha ki skul SSA ha ka shi snem.
“Katkum ka kaiphod ha kaba ïadei bad ka Performance Grading Index (PGI) na ka bynta ka wat kaba ar, ka jylla Meghalaya ka la hiar sha trai duh, ha ka Infrastructure and Equity (PIE) Index 2020-21 jong ki skul Primary bad Secondary ka Jylla Meghlaya ka wan hadien ka Jylla Bihar,” la ong shuh shuh ka Seng.
“La bunsien ha ka por elekshon, u Myntri Rangbah u ju khlei ki jubabnak ba ka Sorkar kan buh hakhmat eh ïa ka Pule ka Puthi ha ka Jylla katba ha ka jingshisha ki nonghikai skul SSA ki pyndep ïa la ka kamram khlem ka bainong bad ka bam ka dih,” ong shuh shuh ka Seng.
“Kumno ngin khmihlynti ba u Myntri Rangbah un pynurlong ïa ki jubanlak ba u la khleh na ka bynta ki nonghikai skul SSA bad ïa ka tnat Pule Puthi baroh kawei haduh khyndiat bnai shwa ban wan ka elekshon 2023,” la kynthoh ka Seng.
Ka Seng ka la byrngem, lada ka Sorkar kam sngap ïa kine ki jingdawa ba shongnia, ki nonghikai skul SSA kim banse ban mih biang sha surok ban pynlong ïa ka jingïakhih wat ha ka sngi rakhe ïa ka sngi ba kyrpang jong ki nonghikai.