Shillong, Nailar, 24: U MLA jong ka Rambrai-Jyrngam Kimfa S. Marbaniang ha ka sngi Baar u la ong ba ka Sorkar Jylla kan sa pyrshang ban ïakren bad ka Sorkar Assam na ka bynta ban wanrah biang ïa ki lai tylli ki shnong sha Meghalaya kiba hap hapoh ka Nongbak Aking bad ka Hima Nonglang.
Kine ki lai tylli ki shnong ki kynthup ïa ka Mallang Hahuapara (ba la tip mynshwa kum ka Okgipu Chiring), ka Mallang Joypur bad ka Mallang Salbari.
Kane ka long hadien ba ki sengbhalang na rilum Garo ki la pynlong da ka jingïashong kyllaiñ myngngor ha nongbah Shillong ban dawa ïa ka Sorkar Jylla ba ka dei ban bishar biang sa shisien ïa ka MoU ba ladep ïasoi bad ka Sorkar Assam ha ka 29 tarik, Lber khnang ban pynkut noh ïa ka jingïakajia pud hapdeng kine ki ar tylli ki jylla.
Ha ka jingïakren bad ki lad pathai khubor, u Bah Marbaniang u la ong ba u ladep pynsngew ïa kane ka jingdawa hakhmat u Myntri Rangbah u Conrad K. Sangma bad ha u Symbud Myntri Rangbah u Bah Prestone Tynsong.
“Nga kyrmen ba ha ka jingïapynbeit pud ha ka wat kaba ar, ngin sa pyrshang ban wanrah biang ïa ki lai tylli ki shnong ki bym shym la kynthup ha ka jingïakren pynbeit pud ha ka wat banyngkong. Ngin sa pyrshang ban wanrah biang ïa ki sha ka jylla Meghalaya,” u la ong.
Une u MLA u la ong ba ka Sorkar Jylla kan sa ïaleh katba lah ban ym shim ïa kano kano ka rai ba kyrkieh ha ka jingïapynbeit pud ha ka wat banyngkong khnang ba ka Jylla Meghalaya kan ïoh biang ïa kine ki lai tylli ki shnong.
“Lada phi peit ha ka jingsorjamin ha u snem 2011, bun na ki shnong ki la shah kyntait bad ngim lah ban teipop ïano ïano hynrei kaei kaba ladep leh bakla ngin hap ban pynbeit biang bad ban ïakren bad u Myntri Rangbah ka Jylla Assam lyngba u Myntri Rangbah jong ngi khnang ba yn dup lah ban wanrah ïa kine ki lai tylli ki shnong sha Meghalaya,” u la ong.
