Shillong, Nailar 24 : U Myntri ba dei peit ïa ka tnad Public Health Engineering (PHE) u Bah Renikton Lyngdoh Tongkhar ha ka sngi Nyngkong u la ïathuh ba ïa ka jingpyntrei ïa ka Jal Jeevan Mission (JJM) ha ka jylla ka sorkar kan phah ban kheiñ ban diah (audit) ha ki bor ba don iktiar ban leh ïa kane ka kam.
“Ïa ka jingpyntrei ïa ka JJM yn phah kheiñ phah diah ïa ka jingpynlut pynsep bad ka jingpyntrei yn phah leh ha ka Comptroller Auditor General of India (CAG) kumba ju leh ïa ki skhim ba bei tyngka da ka sorkar pdeng” ïathuh u Bah Renikton haba kren bad ki lad pathai khubor.
U Bah Renikton u la ïathuh ba ka jingkheiñ jingdiah kaba dang dep shen ka lap ba ka don katto katne ka jinglap bad ïa kane yn sa rah ha ka sien shong dorbar ban wan. U la ong ruh ba ka kabu ban pyntreikam torti ïa kane ka skhim kan ym jia namar ka don ka Third Party Inspection kat kum ki kyndon ka Ministry of Shakti.
“Ki kontraktor kin sa ïoh pisa bai trei ynda ka Third Party Inspection ka la dep ai syrnot ba ka jingtrei ka long kaba paka” bad u la bynrap shuh shuh “Ka jingleit jurip da ka The third party ka long ban pynthikna ba ka jingtrei ki kontraktor kaba la peit pyrman da ki engineers ka long kaba paka.”
Shuh shuh u Myntri u la ïathuh ba ki don ki Village Water Sanitation Committee (VWSC), “Namarkata, ki bun ki bor kiban peit pyrman ban pynthikna ïa ka jingtrei ïa ka JJM ka long kaba paka na kata ka daw ngam don jingartatien ba ka jingtrei kan ym don jingduna” u la ong.
Haba ïadei bad ka rai ka sokar ba kiba la pyndep ïa ka Indian Railway Traffic Service (IRTS) kum u Commissioner & Secretary in-charge jong ka PHE, na ka liang u Myntri u la ong ba ha ka jingshisha ki ophisar ka tnad ki lah ban bat ïa kane ka kyrdan kat kum ka kyndon ka All India Service rules.
“Kane kan shong ruh ha ka sorkar ban peit la tang ki ophisar ki lah ne em ban trei lada bynshet ïa kane ka lyngkor” u la ong. Na ka liang u Myntri u pdiang ruh ïa ka jingkyrduh IAS ha ka jylla.
“Ka dei ka jingshisha ba ka jylla ka kyrduh IAS shaba palat lada nujor bad kaei ba ngi donkam” u la ong.
Kum ban kdew hangne ba ka sorkar pdeng ka la mang kumba 678.39 klur na bynta ban pyntrei ïa ka skim JJM ha ka jylla na bynta u snem 2021-22 bad kane ka tam jan saw shah ban ïa ka mang tyngka kaba la ïoh na bynta u snem 2020-21.
Kumba long mynta ki long ïing ha ki nongkyndong ka jylla ki don kumba 5.90 lak tylli bad tang 1.88 lak(31.94%) tylli pat kiba la poi um ha ïing jong ki.
Ha u snem 2021-22 na ka liang ka sorkar ka buh thong ba la kumno kumno ka jingpynpoi um sha ki long ïing ha nongkyndong kin kot sha ka 3.38 lak.
