Wan jurip u Myntri Khynnah ka sorkar Pdeng ïa ka Ri Bhoi, pynpaw jingkmen ba pyntreikam hok ïa ki kam pynroi

Nongpoh, Nailar 24: U Myntri Khynnah ka sorkar pdeng, ba dei peit ïa ka tnad Railway, Coal and Mines, u Raosahep Patil Danve mynta ka sngi u la wan ban iuh kjat ha Ri Bhoi District na ka bynta ban buddien halor ki jingpyntreikam ïa ki kam pynroi ha kane ka District kaba la shah jied kum kawei na ka ‘Aspirational District’ napdeng ki 117 tylli ki District hapoh ka ri kiba la shah jied kum kita ki Aspirational District.
Ha kane ka jingwan iuh kjat une u myntri khynnah ka sorkar pdeng ïa ka Ri Bhoi District, la pynlong ïa ka jingïakynduh lang ki ophisar sorkar bapher bapher na Ri Bhoi ha Conference Hall ka ophis u Deputy Commissioner ka Ri Bhoi, ha kaba u Deputy Commissioner ka Ri Bhoi u al ai ka jingbatai (Presentation) halor ki jingpyntreikam ïa ki skhim pynroi bapher bapher kiba dei katkum ka jingmang na kata ka District ba la ithuh kum kata ka Aspirational District.
Ha kane kajuh ka sngi, hadien ka jingwad bniah ïa ki kam pynroi ba la pyntreikam ïa ha kane ka District kum kata ka Aspirational District, une u Myntri Khynnah ka sorkar pdeng, u la ioh lad ruh ban leit jurip ïa ka Aganwadi Centre ha Umdihar, ka Health and Wellness Centre ha Umsawnongkharwai bad kumjuh ruh u la leit ban ïa kynduh ïa ka kynhun SHG kiba dei ki Longkmie ha ka Shnong Saiden.
Haba kren ha kane ka sngi, u Myntri khynnah ka sorkar pdeng, u Roasahep Patil Danve, u la pynpaw ka jingkmen ha kaba ha kane ka jingwan iuh kjat ha Ri Bhoi, u lap ba ki tnad sorkar bapher bapher ki la pyntreikam hok shisha ïa ki kam pynroi kiba la mang kum kata ka Aspirational District bad kane ka jingjied kyrpang ïa kine ki District kum kita ki Aspirational District ruh ka dei namar ba u Myntri Rangbah ka ri, u Narendra Modi u don ka thok ban kyntiew ïa ki District kiba dang sahdien halor ki kam pynroi hapoh ka ri India.
U la pynpaw ai ruh ïa ka jingïaroh kaba khraw ïa ka sorkar NDA ba la lam khmat da ka BJP bad u Myntri Rangbah ka ri, u Narendra Modi, uba don ka jingiohi jngai kumno ban dang kyntiew ïa ki jylla bapher bapher hapoh ka ri India bad dei namar kane ka daw u la wan rah shibun ki kam pynroi hapoh ka ri na ka bynta ban kyntiew ïa ka ri bad khamtam u la leh shibun ki kam kiba ïarap kyrpang na ka bynta kiba duk kum ka jingsam khaw rashon ei, ka jingai dawai ei ban ïada na ka khlam COVID-19 bad kynthup kiwei kiwei ki kam pynroi kiba la kyntiew shisha ïa ka ri ha ka liang ka ioh ka kot bad ka roi ka par.
Namarkata, kum u myntri khynnah ka sorkar pdeng, u Roasahep Patil Danve u la ai mynsiem ruh ïa ki ophisar ka Ri Bhoi ba kin dang treikam kham bha, namar lada ngi lah shisha ban pyntreikam ïa ki kam pynroi kumba la mang da ka sorkar pdeng ka District, ka jylla bad ka ri kan dang kiew shaphrang ha baroh ki liang, u la bynrap.