Nongstoiñ, Nailar, 23: Ka Party HSPDP Nongstoiñ Area Unit ha ka 22 tarik ka la dep pynshai paitbah halor ka khubor kaba la shu pynmih da u President barim u P.K Lyngdoh ha ka 19 tarik mynta u bnai kaba la ong, “La Pynkut noh ïa Executive Committee Nongstoiñ Area Unit, shongthait syndon u President”.
“Kane kam dei kaba shisha hynrei ka dei ka jingpyrshang ban ïalam bakla ïa ki paidbah nongkyrshan. U P.K lyngdoh u ladep ban iehnoh ïa ka kam President, namar ki daw shimet jong u naduh ka 3 Jylliew 2022 bad ka Area ka la dep pdiang ïa ka shithi iehnoh kam jong u ha ka 17 Nailar 2022 ha kaba la phah ruh ïa ka rai sha ka District”, ong ka kyrwoh na u General Secretary ka party Bah Michael Thongni.
“Ka party ka la dep jied thymmai ïa ki nongkitkam, kata u Bah Diostarness Jyndiang Ex MLA, Advisor Bah LG Nongsiej, Ex MDC, Advisor Bah Thingdar Lyngdoh, President Bah Sanjied Kynsai Shangrit, Vice President Michael Thongni, General Secretary Bah G Sohlang, Publicity Secretary Bah Nicholas Marweiñ, Treasurer Bah Coming Kharbani, Organising Secretary Bah Ismel Kharbani, Organising Secretary Bah O Sohlang, Organising Secretary, Bah Norbet Paliar, Member, L Thabah, Office Secretary Bah B Kharbani, Member Bah P Ïawlar, Kong D Diengngan, Kong E Kharbani, Kong E Marngar, Extarly Lyngkhoi, Bah W Lyngkhoi, Member”, pyntip u Bah Michael.
Haba u briew u iehnoh kam, ym lah satia ban pynkhyllem ïa ka EC namar u iehnoh kam marwei bad kumba long mynta u dei ruh tang u riew paidbah namar la dep ban pdiang ïa ka jingiehnoh kam jong u. U la ong ruh ba ka EC ka dang skhem bha naba kiba don bynta ban pynkut dei tang 5 ngut na ka parents. Katba ki President, Secretary, ka Parents, ka Youth Wing bad Womens Wing ki dang skhem.
“Kam dei satia ka rukom ban shu pynkut lada resign u President, hynrei haba dang don ki President dei ban ïalam da ma u ïa ka EC katkum ba la bthah ka Constitution ka HSPDP ha ka Article 25 Section U Vice President Sub Section 2, kaba ong kumne ba lada don ka jingieh noh kam u President, dei u vice President u ban pyntyllun ïa ki kam shakhmat. Shuh shuh u la ong ba ka Nongstoiñ mynta ka dang hap ha ka jingkhmih jong ka central, kam pat lah satia ban lum General Executive Meeting, namar kam pat ithuh kat haduh ban da dep revisit ïa ki Primary Unit bad submit ïa ki list sha ka central ba kan leh ïa kaba donkam.
“Ka long kaba sngewsih ban ïathuh ïa kine hynrei ym banse ban pynshai sha u paidbah, namar ki paidbah nongkyrshan ki la don hapdeng ka lyngngoh bad sngew khun swet. Hynrei na ka bynta kine kiba ïaleh pyrshah kumne, na ka liang ka party ka dang kwah ïa ki ba kin wan shakhmat ban ïatreilang biang na bynta ban pynkhlaiñ ïa ka party ryngkat ryngkat kum shi hynmen shi para”.
“Ngi la dep jied ruh ïa ki nongkitkam ba thymmai ban pyntyllun ïa ki kam bad pyndep ïa ki jingbthah jong ka central bad yn sa rah sha ka GEC, ban pynskhem tad haduh ban da ïoh ïa ka approval jong ka Sub-committee, Central ba ka la ithuh ïa ki Primary Unit hadien ka jingphah ka jong ngi ynda ngi la dep ban thung lut”, u la pynkut.
