Nongstoiñ, Nailar, 23: Ka United Democratic Party kawei na ki seng kaba la kham bun paid napdeng ki seng Ri lum, mynta ka kynti ka la sdang ban pynmih madan shisyndon da u kyrtong MLA ban ïakhun pyrshah ha ka election ka ban wan kaba dei na ka bynta u snem 2023 ha Nongstoiñ.
Katkum ki khubor kiba ïajan bad ka seng UDP Nongstoiñ Pyllun, la ïathuh ba ka seng ka la shim ïa ka rai ban pynïeng ïa u bah Pullstar Nongsiej u ba na ka shnong Upper New Nongstoiñ na ka bynta u snem 2023 kum u kyrtong MLA na ka seng UDP. Ka jingïalang paidbah kan long mynta hi u bnai Nailar ha Nongstoiñ. Ha kane ka jingïalang yn pdiang burom ïa u bah LG Nongsiej ex MDC bad ïa kiwei kiwei.
Kane ka seng wat haba ka la bet ïa u symbai naduh ki phew snem kiba mynshuwa, phewse dei tang ha kane ka kynti kaba ki paidbah ki lah ban ïohi ba la sdang ban mih u shylluid u ba la kham ibit ruh ban ot lada wan ka aiom. Namar ïa u la kyrshan lang ruh da ki riew radbah kiba na ka seng HSPDP kum u bah LG Nongsiej MDC barim ka Nongstoiñ bad na kiwei kiwei kiba na ka seng NPP, Congress bad ka lah ruh ban buh jingma ïa ka khet synshar jong u Bah Macmillan Byrsat MLA ba mynta.
