Pynthikna ka KSU bad ki bahaïing ka Kong (L) Spelity ban ïeng pyrshah ïa ka jingkhlong Uranium wat ha ki por ban dang wan

Mawkyrwat, Lber, 27: U General Secretary ka KSU Central Body, bah Donald V. Thabah u la pynkynmaw na ka bynta ki dkhot jong ka seng ba wat hapdeng ki jingeh kiba bun na ka jaidbynriew ka mat ha ki por ba mynshwa hynrei ka seng haduh mynta ka dang don hapdeng kiba bun ki jingïakhun la ka long da ka bor met ne wat da ka bor jabieng ruh, ha kaba watla ki hap ban mat ïa ki um-mat kthang haduh ban da ïoh ïa ka jingjop.
U kren kumtei namar ha ki por ba mynshwa bym pat don ka KSU, ka jaidbynriew jong ngi ka la mad shibun ki jingeh naduh ka jingshah thom bor, jingshah shoh shah dat ha ki briew kiba heh paid namar kine wat ïa ki trai muluk ki trai shnong trai thaw ki ktah kti bad kine ki jia na ka daw ba ki ki don hapdeng jong ka jingïapait ïa pra bad ymdon hi ruh kita ki ban ïa khun pyrshah ïa ki mynder ri.
U General Secretary ka KSU Central Body, kum u kongsan u la ong ruh ba kum ki dkhot jong ka seng ki dei ban long ki samla ki ban kyrsiew thiah ïa ki para samla jong ka jaidbynriew ban tei ïa ki kynroh ban pynskhem ban ïeng pyrshah khnang ba ka sorkar India lyngba ka UCIL kan nym lah ban khlong ïa u marpoh khyndew ne uranium napoh ka thaiñ Domïasiat, South West Khasi Hills District.
Ha kajuh ka por, haba kren ha kaba ïa dei bad kane ka jingïakhun pyrshah ïa ka jingtih ïa u marpoh khyndew, u Donald u ong ba kane ka kam ban pyrshah ai kan long manla ka por, ym ba kan kut noh tang shiteng, da kaba ong, “lada ka UCIL ka kwah ban khlong ïa u marpoh khyndew, ka dei ban khlong shwa ïa ka met ka phat jong ngi ne ïa u klong snam, bad lada ka lah ban leh kumta, ka UCIL ka lah ban tih ïa u”, ong u bah Donald.
Shuh shuh u la ong ba kum ki dkhot jong ka seng kaba donkam ka long ba kin don ka jingïatylli, jingbym ïasngewphew jingmut watla ki khlem shah jied ne shah rem noh. “Kam pher watla la ngi don ka jingïapher ha ka niam, ngi pher ha ka distrik, ngi pher ha ka rukom im, hynrei ka KSU ka long pynban kawei na ki ïit khmih ban pyni nuksa ïa ka jingïatylli, jinglong kawei jong ka jaidbynriew”, u la ong.
U la pynpaw ruh ba ka jaidbynriew jong ngi ka don ar jait ki jingpang, kawei ka dei ka jingpang kaba nabar ba da ka jingwan rung kyrthep jong ki bar jylla, ka jingshahknieh ïa kam ki jam ha ki poi ei shi sngi, bad kiwei kiwei de. Hynrei hapdeng kine kiei kiei kane ka jaibynriew ka don ruh ha ka ïa ka jingpang ba napoh bad kita ki long ka jingïakynthoh, ka jingïa-beiñ iwei ïa iwei pat, ka jingïatharai sniew, ki jingngop ha ki jingkam sniew kum u kynja bad u drok kine baroh ki dei ki jingpang ban bam kruiñ ïa ka jaidbynriew baroh kawei.
Namarkata, kum ki dkhot jong ka seng ki dei ban ïeng tylli ban don ka jingïakhun bad ban rad-dyngkhong ruh ïa ki jingpang ne ki jingsniew kiba long ka daw ban pyntroiñ ïa ka ri bad ka jaidbynriew.
Haba kren ai mynsiem na ka bynta ki dkhot jong ka seng, u bah Donald V. Thabah u la ai jingmut ba ki dei ban long borabor kiba ïatreilang ha ki liang baroh bad ki dei ban pule ruh ïa kot lyngkdop ne ka kot thoh ïa ka rukom treikam jong ka seng khnang ba ka rukom treikam bad long dkhot kan long kaba janai.
U la ai jingmut ruh ïa ki dkhot ka seng ba kim dei ban shu long dkhot kumto khlem da tip ïa ki nongrim hynrei ki dei ban tip ruh kumno ban treikam na ka por sha ka por namar ki dei ban pynshong nongrim bha khnang ba ki kam ki jam kin long kiba janai. Ka KSU hi kam dei ka seng tang jong uwei ne ar ngut bad ka rai ban leh ïa kano kano ruh ymdei ba rai tang u President ne Secretary hynrei la shim beit da ka Central Executive Council.
U la pynkynmaw ruh khyndiat ïa ka jingsdang ban seng ïa ka KSU South West Khasi Hills District bad kumjuh ruh ka jingthaw ïa ka District Demand Committee ban dawa na ka sorkar ban ai distrik thymmai noh da kaba phiah ïa ka West Khasi Hills District sha ki ar bynta ka West bad South West.
Ha ka jingkren jong u Kitboklang Syiemlieh, President barim jong ka KSU South West Khasi Hills District u la pynkynmaw ba la seng ïa ka ha ka 18 tarik u Nohprah, 2002 bad la seng ïa ka tang da ki lai tylli ki unit kata da ka Nongnah, Langkynma bad Border Area.
Haba ai mynsiem na ka bynta ki nongkitkam kiba thymmai, U la ong ba hapdeng kiba bun ki kam ban pyntyllun nangne shakhmat kin sa mat shibun ki jingeh ha ka jingïaid lynti, hynrei kynmaw ba ki dei ban don ka mynsiem jong ka jingñiewkor, ïai-neh bad skhem ha la ka nongrim khnang ba kin lah ban thom ïa ki jingeh baroh.
“Leh ïa kiei kiei kiba bha na ka bynta jong ka jaidbynriew ban long ka jingmyntoi ym ïa lade hynrei na ka ka ri bad ka jaidbynriew baroh kawei”, ong u bah Kit bad pynkut da kaba ong, “ki ‘riew stad ki ‘riew shemphang ki synñiang ïa ka imlang ka sahlang da kaba bha ym da kaba sniew”.
U Forwardman Nongrem, kum u President ba thymmai ka KSU South West Khasi Hills District ha ka jingkren jong u la pynpaw ïa ki lai tylli ki bynta ba kongsan ba kum ka seng ka don ban leh nangne shakhmat, kawei ka long ban peit halor ka jingthungkam thungjam hapoh jong ka South West Khasi Hills District, kaba ar ka dei ka mat halor ka kam jong u marpoh khyndew ne uranium ha kaba kum ka seng ha ryngkat kiba ha ïing ha sem jong ka kong (L) Spility Lyngdoh Langrin ka dang ïeng ïaleh pyrshah haduh mynta bad wat ha ki por ki ban dang wan ruh bad kumjuh ha kaba ïa dei bad ka mat jong ki kam sniew kiba la sdang ban jyllei ha kine ki sngi kum u drok kiwei kiwei de ba kum ka seng ka kwah ban ïa khun ban rad-dyngkhong khnang ban wanrah ïa ki jingkylla bad ban pynbha pynmiat ïa ka imlang ka sahlang.
Ha kane ka sngi la ïoh ruh ban pynskhem ïa ki nongkitkam ba thymmai da u General Secretary jong ka KSU Central Body, u Donal V. Thabah ha kaba la jied President da u Forwardman Nongrem, Vice President u Shemphang Nonglang, General Secretary u Jiedskhem Nongsiej, Assistant Secretary u samla Samborlang Shabong, Organising Secretary u samla Pulljohn Wanniang, Education Secretary u Samla Evansroy Nongrem, Publicity Secretary u samla Macdonald Marbaniang, Environmental & Cultural Secretary u Plosbor KharJahrin bad Office Secretary u samla Everwell Thongni.
Kiwei ki nongkren ki long u Jiedskhem Nongsiej, General Secretary ka KSU South West Khasi Hills District, u Raymond Kharjana, Education Secretary KSU Central Body, u Forwardman Nongrem, President ba thymmai jong ka KSU South West Khasi Hills District.
Kiba ïa donlang ha kane ka sngi ki long naduh ki ‘riew Rangbah jong ka thaiñ, ki nongïalam barim jong ka KSU bad kiwei de ki sengbhalang kiba la shah khot sngewbha ha kane ka sngi.
Ban pynshit pynshngaiñ ïa kane ka jingïalang la ïoh ïa ki ar tylli ki jingrwai kyrpang kata na ka samla Shabanri Kharraswai bad kumjuh ruh na ka kynhun Thylliej U Maram.