Nongstoiñ, Lber, 27: Kumba kalong mynta, ka dor ka mur jong ki mar rep mar riang ba ki nongkyndong ki pynmih ka la pynlong ïa ki paidbah nongrep ba kin ïakynduh jingeh ha kiba bun ki liang.
Katto katne ki nongrep sying ki la pynpaw ïa ka jingsnewkhia halor ka jingbym biang ka ïew ka hat na ka bynta ban pynïaid ïew ïa ki mar rep jong ki. Ki la ïathuh ba ha ki snem ba la dep ka dor jong u sying lada dei u ba bha duh ka dor ka poi tang arphew tyngka shi kilo bad u sying u bym da bha lei lei ka dor ïew ka poi tang shiphew tyngka shi kilo kata ruh lada leit die ha ïew Hahim.
Ki la ong ba lada ym leit die ruh u shu pyut ei lada leit die ruh tang ka bai kit ruh ym mih shuh namar ka jing kiew dor palat ka umpnniang kali bad kane ka la buh ïa ki paitbah nongrep sying ha ka jingeh kaba khraw. Nalor kata ki la ong ruh ba lada ka ïew sying ka long sah kumne kim banse ban hap sangeh noh ban rep namar lada rep bun ruh ym lah shuh ban pynmih ïa ka bai bylla ban rep khyndiat ruh kam don jingmyntoi shuh.
La ong ba kawei pat ka jingeh ka long ba ha kine ki lai snem mynta ka jingpyut u sying ha man la ki jaka rep ka jur bha ym lah ban tip na kaei ka daw. Katto katne ki nongrep sying ki la ïathuh ba ki la pyrshang ban pyntip ha ka tnad Horticulture ha Nongstoiñ, ba kan pyntip sha ka sorkar ba kan thaw ki lad ki lynti ban phah wad bniah ha ki stad kiba dei peit ïa ki jingthung jingtep, khnang ban lap ïa ka daw bad ban ïada na katei ka jingpyut.
