Mih ka jingkynnoh ba kyntait u bahaïing jong u MLA ban pynwad jingïarap na u MLA Mawhati

Nongpoh, Lber 27: Ha kawei ka jingjia pluh iing kawei ka longiing kala hap ban mad ïaka jingjia ba sngewsih hadien ba ka ding kaba la klang kala bamduh syndon baroh ki jingdon jingem bad ki tiar ki tar haduh da kylla dpei haka shnong Umrnong ha Ri-Bhoi kaba hap ha Mawhati Constituency.
Katei ka jingjia kala jia haka sngi Saitjaiñ haka shnong Umrnong haka por 2 baje eiei ha kaba katei ka iing kaba dei jong ka kong Melina Shadap bad u Boniphas Nongrum kiba don ruh 5 ngut ki khun ba dang rit ka rta bad donbok ba ha katei ka jingjia ym shym don mano mano ba mynsaw.
Haba ïakren bad ka kong Melina Shadap kaba dei ka kmie kala ïathuh ba hynnin ka sngi haka por kumba 2 lane 3 baje ka dang ai ja ïaki khun ha iing, katba u kpa u dang leit bylla sha kla jaka ba kham jngai hynrei kala shu sngew kynsan ïaka jingsawa hajan iing bad mar mar kala mih shabar ban peit ha kaba kala iohi pynban ba ka ding kala klang hajan iing bad ha katei ka por kala pyrshang ban pyrta jingïarap naki para marjan hynrei kim lah shuh ban leh eiei namar ka jingklang jong ka ding bala suba ruh ba ka dei naka jingthang khlaw.
Kala ïathuh ruh mar mar kala phah mih lut ïaki khun shabar bad sei katto katne ki tiar katba ka lah ei ha shuwa ba ka ding kan bam duh bad ha katei ka jingjia baroh ki jingdon jingem kila kylla dpei lut.
Halor katei ka jingjia ki bahaiing jong kitei ki lanot kila pyrshang ruh ban wad ki lad jingïarap bad pyrshang ruh ban phone sha uwei u briew ba dei u bahaiing jong u MLA ka Mawhati, hynrei utei u briew u la kren heh pynban bad kyntaid ban pynïakren da kaba ong ba u Bah Dasakhiatbha Lamare um ieng elekshon shuh na Mawhati kaba buh ïaki bahaiing hapdeng ka umdum.
Naka liang kitei ki trai iing kila kyrpad ruh ïaki kynhun bapher bapher, naduh ki nongmihkhmat ban noh jingïarap lem sha katei ka longiing naka bynta ba kin lah pat ban shna biang ïaka iing ba kin shong kin sah namar ki dei ki longiing ba duk ba rangli.