Ym hun u Myntri ka Sorkar Pdeng ba shu batai ki Ophisar da ka ktien khlem jingthoh

Shillong, Nailar 12 : U Myntri Khynnah ka sorkar pdeng u Bishweswar Tudu mynta ka sngi u la pynpaw ïa ka jingbym sngewhun ha ka jingïakynduh bad ki Ophisar ka sorkar jylla haba u pan jingtip bniah bad kumjuh ruh ban pan jingkheiñ ha kaba ïadei bad ka jingpyntrei ïa ka skhim Jal Jeevan Mission (JJM) hapoh ka jylla na ka bynta ban pynpoi umdih shaman la ki tyngkong ïing jong ki nongshong shnong namar ki la ai jubab tang da ka ktien khlem ka jingthoh.
Haba kren bad ki Lad pathai khubor ha State Convention Centre u la ong “ Ngam hun ïa ka jingleh jong ki ophisar, ha kane ka jingïa kynduh ki shu batai ïa kaei kaba ki la leh da ka ktien hynrei kim shym la ai da ki jingthoh ha kaba ïa dei bad ka skhim JJM khatam eh haduh katno ki la lah lah ban pynpoi um sha ki long ïing ha ka jylla”.
U la ong ba ha Meghalaya ka jingpynpoi ïa ka um bam umdih sha ki longïing lyngba ka skhim Jal Jeevan Mission ka long tang kumba 44% katba ha ka Ri India baroh kawei ka long 51%, ka thong jong ka sorkar pdeng ka long ban pynpoi umdih sha baroh ki tnum ïing ha ka Ri India ka long ha u bnai Lber 2024.
Haba jubab ïa ki jingkylli ba hato ka don ne em ka jingsuba ba ka don ka jingbam sap ha kaba pyntreikam ïa kane ka skhim u la ong na ka liang jong u kat haduh mynta ym shym la ïoh pdiang kano kano ka jingujor pyrshah ïa kano kano ka skhim, lada ka don ka jingujor un sa peit bniah hynrei ïa mynta kam shym don kano kano ka jingujor ïa ki jingpyntrei ïa ka skhim.