Nalor ka jingai ïaki jaka sha Assam, ka sorkar MDA kala pynlong ïaka Ri-Bhoi District kum ka ktem khalai: George B Lyngdoh

Nongpoh, Nailar 10: U Bah George B Lyngdoh u ba dei u MLA jong ka Umroi bad u Vice President ka Trinamool Congress haka jylla u la ther tyngeh ïaka sorkar MDA haka jingïalang jong ka party kaba la long mynta ka sngi ha Byrnihat kaba la pynlong aiñ ïaka kam khalai bad pynlong ruh ïaka Ri-Bhoi District kum ka ktem khalai ban wanrah ruh ïaki briew ba nabar ban wan khalai.
U la ong ruh ba napdeng baroh ki district haka jylla hapoh ka jingsynshar jong ka sorkar MDA ka Ri-Bhoi District ka dei kaba duhnong tam, naduh ki jaka puta kiba la leit lut sha Assam haka jingpynbeit pud bad bala shu ai mon sngewbha ïaki jaka khlem da shim bad sngap ïaka sur u paidbah, bad kitei ki nongshong shnong kin sa kylla kum ki poi wir haka jylla Assam bad kaba kham ma shuh shuh ka long ba kin ngat haki kyndon jong ka NRC.
“Ka sorkar kam burom shuh ïaka jingud jingnam jong ki paidbah khamtam ki briew kiba sngewthuh shai bad iohi jngai bym dei ban wanrah ïaka ktem khalai, hynrei la pynlong aiñ pynban ïaka kam khalai bad wanrah ruh ïaka ktem khalai ha Ri-Bhoi District” la ong u Bah George.
U la ong ruh ba kane ka sorkar mynta kala pynlong ïaka Ri-Bhoi District kum ka ktem khalai,ka khalai ïaka jaka jong ngi, ka khalai ruh ïaka lawei jong ngi bad ki khun samla bad mynta ka wanrah ruh ïaki nongkhalai na kylleng jong ki jaka jong ka ri nalor ba ki briew kim pdiang bad tip shai ba ka kam khalai ka dei kaba sniew, hynrei ka sorkar kala jied ïaka Ri-Bhoi District.
Namarkata ki paidbah ki dei ban sngewthuh shai ha kane ka kynti ba mynta ban pynjop ïaki kyrtong kiba stad, kiba iohi jngai ïaka lawei jong ki khun samla bad ka jaitbynriew bad dei tang ka party TMC kaba lah ban wanrah ki jingkylla kumba ka dang dei ka party kaba thymmai bym pat don dak thohbria haka jylla