Nongpoh, Nailar 10: U Working President ka UDP Umsning Circle, u Bah Carlus Kharkongor mynta ka sngi u la pynbna syndon ba u la iehnoh shadien ïaka party UDP kaba u don baroh shikatta ban leit kyrshan pat ïa u Bah Jason S Mawlong u ba dei u MLA ka Umsning Contituency ha kane ka elekshon ban wan.
Haba kren sha ki lad pathai khubor mynta ka sngi u Bah Carlus Kharkongor kum uwei naki nongtrei ba shitrhem ka party UDP haki snem bala leit noh u la iehnoh naka kam kum un working President ka UDP ha Umsning bad u dkhot ha Ri-Bhoi District namar ki daw shimet khlem don mano mano ba pynbor.
Hadien ka jingiehnoh ïaka kam kum uwei naki nongïalam ka UDP ha Umsning naka liang u Bah Carlus u la pynbna ba un leit ban kyrshan noh ïa u Bah Jason S Mawlong ban pynjop don burom ha kane ka elekshon ban wan, kumba ki paidbah ki dang shanñiah ha u Bah Jason ban shimti biang ïaka kam kum u nongmihkhmat na Umsning Consituency.
U la pynpaw ruh ba u Bah Jason S Mawlong haduh mynta bun naki paidbah ki dang ieid bad kyrshan ban pynjop don burom biang ha kane ka elekshon ban wan bad kum uwei naki nongïalam u ba la ju don bynta ha ka kam saiñ hima sima, ryngkat bad ki nongkyrshan jong u kin leit ban pynïasoh noh bad ka party kaba u Bah Jason S Mawlong un ïakhun na Umsning Consituency.
