Shillong, Nailar, 09: Ka Sorkar Jylla ka la rai ban pynlut pisa T.50 lak lyngba ka Police Infrastructure Renovation Fund (PIRF) na ka bynta ban maramot bad ban shna pynbha ïa ki Police Stations, ki Police Outposts, ki Fire and Sercvices Stations bad ki Anti-Dacoity Camps kiba don ha ki 12 tylli ki District jong ka Jylla.
Ïa kane ka rai la mynjur da ka Kynhun Myntri ha ka sngi Baar.
Ha ka jingïakren bad ki lad pathai khubor, u Myntri ka Sorkar Jylla u James PK Sangma u la ong ba ka Kynhun Myntri ka la mynjur ïa ka jingtyrwa ban thaw ïa ka PIRF namarba ka kam ka la long kaba kyrkieh na ka bynta ban maramot bad ban shna pynbha ïa ki shlem treikam jong ka tnat Pulit.
“Ngi sngewthuh ba ha ki snem ba la leit noh, ki shlem treikam jong ka tnat Pulit ki la donkam ban maramot bad ban shna pynbha hynrei namarba ym shym don ka pisa ka la buh jingeh bad namarkata, kane ka la ktah bha haduh katta katta ïa ka jingtreikam jong ka tnat Pulit ban ai jingshakri sha ki paidbah,” u la ong.
U la pyntip ba ki jingtrei kiba la mang pisa lyngba ka PIRF kin long tang ka bynta ki jingshna bad ki jingmaramot ïa ki jaka treikam ba la kham donkam kyrkieh ha ki police station, ki outpost, ki fire service station, ki anti-dacoity camp bad ki Battalions bad kine ki donkam ban leh noh mardor ïa kiba yn sa rai da ki District Level Committee ki ban sa khlieh da ki Deputy Commissioner ha kaba ki Superintendent of Police, ki Commandant jong ki Battalion bad u Project Director jong ka DRDA bad u Executive Engineer jong ka DRDA kin long ki dkhot
U Myntri u la bynrap ba kiwei kiwei ki jait jingtrei ki ban sa pyntreikam hapoh ka PIRF kan long na ka bynta ka jingpynbha ïa ki Police Stations, ki Outpost kum ha kaba shna ïa ki paiñkhana, ki jaka dih um, ki jaka shongkai, ka jingai rong bad ïa ka jingpynbha ïa ki waïar tan bording bad kiwei kiwei kiba la kham donkam kyrkieh.
Ha kajuh ka por, ka Kynhun Myntri ka la mynjur ruh ïa ka jingkren ban sa pule ha ka jingrakhe Independence Day ka ban sa rakhe ha ka jylla baroh kawei.
Ka Kynhun Myntri ka la mynjur ruh ban wanrah ïa ka jingpynbeit thymmai ha ka Meghalaya Fiscal Responsibility and Budget Management Ordinance. U Sangma u la ïathuh ba ka jingwanrah ïa kane ka Ordinance ka long ban pynbeit thymmai ïa ka Meghalaya Fiscal Responsibility and Budget Management Act, 2006.
“Kane ka jingpynbeit thymmai ka long katkum ka jingbthah lyngba ka shithi ba la ïoh pdiang na ka Department of Expenditure ka Ministry of Finance ka Sorkar India kaba ailad ïa ngi ban pynkiew ïa ka jingshim kylliang da 5% khnang ban pynjanai ïa ka jingtreikam ha ka tnat sam bording,” ula ong.
“Ïa kane ruh la ïathir sani bha bad la mynjur da ka Kynhun Myntri bad ka jingpynkiew manla u snem kan long 4% na ka GSDP na ka bynta u snem 2022 bad 2023,” u la ong.
Ka kynhun Myntri ha kane ka sngi, ka la mynjur ruh ïa ka jingtyrwa ban pynbeit thymmai ha ka Meghalaya Stamps (Payment of Duty by means of e-Stamping) Rules, 2020.
