Nongstoiñ, Nailar, 09: Katba nangmih ki sngi ka All India Trinamool Congress Nongstoiñ constituency ka la nang kiew bad ka la nang khlaiñ haman la ki shnong bad ki jaka.Dang ha ka janmiet jong ka lah sngi u BLei ka 8 tarik Nailar u bah Makmilan Kharbani President ka AITC Nongstoiñ constituency ryngkat bad ki nongkitkam jong ka hadien ba ki paitbah nong shong shnong jong ka Mawïawaban ki la khot ki la leit ban pynlong ïa ka jingïalang ha kaba palat shispah ngut ki paitbah ki la ïawan bad ki la pynïasoh sha ka party kum ki nongkyrshan ba pura.Ha katei ka jingïalang u bah Makmilan u la ai jingkren bad u la pynshai ha ki paitbah ba ka All India Trinamool Congress ka dei ka sengsaiñpyrthei kaba la suh thied bha ha ka ri India baroh kawei.U la pynshai ruh ba ha kine ki sngi ki paitbah jong baroh ki jylla ha ka ri India ki la phai khmat sha ka AITC namar ka party ka ïeng skhem ban ïada ïa ka hok jong ki paitbah bad ka thong ba ha khmat ka long ba ki nongïalam bad ki nongmihkhmat jong ka party kin long ki shakri bad ki paitbah nongshong shnong kin long ki kynrad.
U bah Kahrbani u la pynshai ruh ba ka party ka ïakhun tyngeh ruh ban pynïoh ïa ka hok ki nongrep bad ban kyntiew ïa ka ïoh ka kot bad ban ïaleh pyrshah halor ka jingkiew dor jong ki mar ki mata kaba la ktah haduh katta katta ïa ki paitbah ka ri baroh kawei.U la ong ruh ba wat ha kane ka jylla Megalaya ruh ka AITC ka la suhthied bha khamtam ha Garo Hills bad lada ki paitbah ki sngewthuh ki la dei ban pynkylla noh ïa ki nongmihkhmat bad kin ai ka jingkyrshan ba pura ïa ka AITC khnag ba ka roi ka par, ka ïoh ka kot , ka kamai kajih ka kiew shaphrang.Ha katei ka sngi la pynskhem ruh ï ki nongkitkam jong ka Mawïaban Primary Unit bad ïa baroh ki dkhot kiba la wan ban pynïasoh sha ka party.
