Shillong, Nailar 08 : U Myntri barim ka tnad ka Koit ka Khiah ka jylla ba dei ruh National Executive Member ka BJP bad MLA na Pynthorumkhrah Constituency, Bah AL Hek hynne ka sngi Nyngkong u la pyllait paidbah ïa ka kot ba ai kyrteng, ‘Modi@20 : Dreams Meeting Delivery’ ha ka jingïalang kaba long ha ophis treikam jong ka BJP hi kaba don ha ka nongbah.
Lah ban kdew hangne, ba u Myntri Rangbahduh ka Ri, u Narendra Modi u la pyndep ïa ka jingshakri kaba 20 snem kum u nongïalam ka jylla, kata na kum u Myntri Rangbah ka jylla sha ka kyrdan Myntri Rangbahduh ka India. U Modi u la shimti kum u Myntri Rangbah ka Gujarat ha usnem 2001bad ïai neh ha katei ka shuki tad haduh ba un da shimti kum u Myntri Rangbahduh ha u 2014 bad bteng biang ïa ka hadien ba u la jop biang ha u 2019.
Ïa katei ka kot kaba la dep ban pyllait nyngkong ha nongbah jong ka Ri, la dep ruh ban pyllait ha kylleng ki jylla bad ha kane ka sngi Nyngkong la pyllait ruh ha Meghalaya.
Katkum ka jingïathuh da u Sunil Arora, CEO ka Health Sevak, ïa katei ka kot la thoh da bun ngut ki nongthoh ba pawnam kiba la kdew bad batai sani ïa shibun ki jingkylla ba ka ri ka tyllun hapoh ka jingïalam jong u Modi ha kine ki 20 snem.
Na ka liang u Bah AL Hek pat u la ong ba ka jingkiew jong u Modi shaduh ka kyrdan Myntri Rangbahduh jong ka Ri, kadei ka bynta kaba kongsan bha kaba baroh ki lah ban tip lyngba katei ka kot. U ong ruh ba ka jingjop jong u kum u nongïalam ka Ri kadei namar la phrang ïa u naduh ka por kum u nongïalam jong ki samla BJP nangta kum u MLA ka Gujarat ter ter kum u Myntri Rangbah bad haduh ba un da poi sha ka kyrdan kaba u don mynta.
Ha kane ka sngi, la donlang ruh ki nongïalam jong ka party kynthup naduh u Vice President ka State BJP, u Bah David Kharsati nalor kiwei kiwei.
