Shillong, Nailar, 07: U Symbud Myntri Rangbah ka jylla uba dei peit ïa ka tnad PWD (Roads) bad kumjuh ruh ïa ka tnad pynmih bording (Power) u la ïathuh ba shen yn sa leit jurip ïa ka jaka ban tei ïa ka jingkieng ba thymmai na sharum ka Dam Umïam khnang ban pynïaid kali noh na kane kaba thymmai ym shuh na kane kaba rim kaba den artat ïa ka um.
U la ïathuh na ka liang ka tnad PWD ka la dep thung ïa u consultant na ka bynta ban tei ïa katei ka jingkieng ka ban neh syndon junom bad ka ban ym ktah shuh ïa kane ka jingkieng kaba mynta. Namar kane kaba mynta ka la rim bad la mana ba ki trok ba kit palat ïa ka jingkhia ba la buh ba kin kit ruh kim lah ban ïaid na kane ka jingkieng.
U Consultant u dang pynkhreh nadong shadong bad shen yn sa leit jurip ban pynkhreh ïa ka DPR bad hadien kane yn sa leit ban pan jingïarap na ka sorkar pdeng na ka bynta kane ka projek.
U la ïathuh ka tnad PWD ka la dep ithuh ïa ka jaka ban tei ïaka jingkieng kaba dei sha rum jongkane ka Dam ba mynta.
Ha kaba ïadei bad ka Shillong – Western By Pass u bah Prestone ula ïathuh ba ka DC jongka East Khasi Hills bad DCjongka Ri Bhoi ki dang pynïaid shakhmat ïa ka kam khamtam ban ïoh ïa ka jaka ban ïaid lyngba ka surok.
“Ngi la shaniah ha ka jingstad jongki DC banl eh ïa kaba donkam baroh,” ong u Symbud Myntri Rangbah.
Ha kaba ïadei bad ka jingsniew ka surok Shillong shaduh Jowai,u Symbud Myntri Rangbah u la ong ba kane ka jingsniew ka dei naduh Mawryngkneng ter ter sha rum bad tang shu la rang ka bneng yn sa sdang noh ban pynbha ïa kane ka surok ruh. “ Ngin pynthikna ban pyndep ïa ka jingpynbha ïa kane ka surok ha kine ki bnai tlang” pynkut u bah Prestone.
