Sohra, Lber 24: Ka Shnong Mawmluh, kaba la shah lynshop na ka jingnang troiñ ka karkhana pynmih dewbilat MCCL, mynta ka la phai khmat ban pynim ïa ka shnong da kaba phai khmat sha ka kam jngoh pyrthei.
Kawei na kine ki jingphai khmat sha kane, ka long ka jingplie ïa ka 100 Waterfalls Camp, kaba dei ka jaka sah kaba lah ban ïohi kyndiang ïa ki spah tylli kshaid ha ka por lyuir ba jur slap, kynthup ïa ka kshaid Laipateng khohsiew bad khyndiat ïa ka Kshaid Nohkalikai.
Ki don saw tylli ki ïing kiba la shna da ka rukom kaba itynnad ha kaba la sop da ki kynja jaiñ kum ki tyrpal bad hapoh pat la pynitynnad bha ïa ki kamra ban sah ha kaba la shna ruh ïa ka kamra leit bar bad kamra sum.
Ïa kane ka Camp la shna da ka Mawmluh Tourism & Allied Activities Co-operative Society (MTACCS) da ka jingkyrshan pisa ka Meghalaya Rural Tourism Co-operative Federation Ltd.
Ïa kane ka Camp kaba don ha syndah jong ka Nan jong ka Shnong Mawmluh, la plie da u Bah Balajied Synrem, u MLA jong ka Shella, ryngkat ka jingïadon lang u Dr. Vijay Kumar Commissioner Secretary Tourism, Kong S. Rynjah, Director Soil and Water Conservation, u SDO Sohra Civil Sub Division, Bah L. Kynjing bad kiwei kiwei.
La ïadonlang ruh u Sirdar ka Mawmluh, Bah P. Kharwanlang, u Chairman ka MTACCS, Bah PSLyngdoh ryngkat ki dkhot ka EC jong ka Shnong, ki nongmihkhmat na ka Seng Kynthei, Seng Samla bad kiwei kiwei.
U Bah Balajied haba kren kum u Kongsan ha kane ka jingïalang, u la pynpaw ka jingsngewkmen ba ka Shnong Mawmluh, ka ïoh ïa kane ka projek na ka bynta ban kyntiew ïa ka kam jngoh pyrthei kaban long ka jingïarap na ka bynta ki nongshongshnong bad khamtam ha ka liang ka aijam aijam ïa ki khynnah samla.
U Dr. Kumar, u la ïathuh ba kumno ki nongïalam ka MTACCS, ki la wan ïakynduh ïa ki ophisar ka tnad Tourism na ka bynta kane ka projek bad na ka liang jong u ruh shuwa ban sdang u la wan ban jngoh ïa kane jaka bad dei namar ka jingïohi ïa kiba tylli ki kshaid ki bym lah shuh ban ñiew la ai kyrteng syndon da ka 100 Waterfalls Camp.
U Kumar, u la ong ba ka Mawmluh bad ka thaiñ Sohra ka dang dei ban nang ïaksaid shuh shuh ban kyntiew ïa ka kam jngohkai pyrthei, namar kadei ka shnong kaba paw ha ri India bad ha ka pyrthei hi baroh kawei. U la ïathuh ruh ba na ka liang ka Soil and Water Conservation Department, ka la man pisa 1 klur tam ban shna sa ïa ka Restaurant ha kane ka jaka, khnang ba kiba sah ha kane ka Camp kin suk ban ïoh bam.
La ïoh jingkren ruh na u Secretary ka Shnong, u Bah Banlam Kupar Lyngdoh, uba la ai ïa ka histori lyngkot shaphang ka shnong Mawmluh.
Ha kane kajuh ka sngi, la plie ruh ïa ka Higland Camp, kaba don harud nong jong ka Mawmluh. Kane ka don lai tylli ki ïing kiba la shna hi da ki kynja jaiñ tyrpal bad shapoh pat la shna itynand bha. Kane kadei ka jaka sah kaba ki briew kiba poi ki lah ban ïaid kai pyngngad sha ki lum ki wah, ki madan phlang bad ki jaka khwai ha ki wah duid.
Ha kane ka jaka na ka liang ka tnad kam shang pyrthei kan mang pisa shuh sa 15 tylli ki Camp.
La pynphuh pynphieng ïa kane ka Prokram da ka jingrwai da ki kynhun Rangdajied bad ki Kynthem.
