Wan ba lai u Banteilang Jyrwa ha ka overall ha ka Rally de Hampi 2026
Shillong, Naiwieng 21: U Banteilang Jyrwa u la ïoh ïa ka jingïaroh hadien ba u la lah ban pyni ïa ka jingtbit jong u ha ka ïakop ñiah thuk thuk kaba la tip da ka ‘Rally de Hampi 2026’, kaba la long ha ka 14 bad 15 tarik Naiwieng, ha kaba u la wan ba nyngkong ha ka kyrdan jong u bad ba lai ha ka thup Overall.
Ha ka kyrwoh khubor ka Meghalaya Motorsports Society (MMS) ka la ai khublei kyrpang ïa u Banteilang, da kaba pynpaw ba kane ka jingjop ka wanrah ïa ka jingithuh ym tang ïa u Banteilang hynrei wat ïa ka jylla Meghalaya bad ka jingroi jong ka ha kane ka jingïalehkai.
“Ka jingjop jong u ka pyni ïa ka jingtbit ki nongïalehkai na ka jylla bad ka long kum ka jingai mynsiem ïa kiwei pat kiba sngewtynnad ïa kane ka jingïalehkai”.
Haba phai sha kane ka jingïakop kaba la long ha Hampi, Karnataka, ka long shi bynta jong ka Round 2 jong ka MRF MoGrip FMSCI National Rally Championship (Two-Wheeler).
U Banteilang, uba ñiah ïa ka RTR 200, u la ïashim bynta ha ka jingïakop jong ka Class 4 SUPER SPORT Above 165cc up to 260cc Group B Category, ha kaba u la lah ban wanrah ïa ka jingïakhun kaba kyrpang ban khur ïa ka jingjop.
Mynta u Banteilang u mihkhmat ïa ka Team Petronas TVS Racing, ka jingjop jong u ka ïeng kum ka sakhi ïa ka jingkut jingmut, ka jingtbit, ka mynsiem ïakhun bad ka jingaiti lut ha ka jingïalehkai, ong ka MMS.