Hiar jurip ka HNYF ïa ki ar tylli ki skul : Lap shibun ki jingduna ha ki jingdonkam ki khynnah skul bad ki nonghikai
Mawkyrwat, ‘Naiwieng 19 : Ka Hynñiewtrep National Youth Front (HNYF), South West Khasi Hills District, ka la hiar jurip ïa ki ar tylli ki skul kiba don hapoh ka South West Khasi Hills District, ha kaba ka seng ka la lap ïa shibun ki jingduna ha ki jingdonkam ba kongsan kiba ktah ïa ka rukom ai jinghikai bad ka jingbit jingbiang jong ki khynnah skul.
Ha kane ka jingjurip, ka seng ka la lap ïa ki jingduna ha kine ki ar tylli ki skul kata ha ka Pyndensohsham Government Lower Primary School ka seng ka la lap ba ym don satia ki miej bad ki shuki (Bench and Desk) na ka bynta ki khynnah skul. Nalorkata, ka skul ka dang duna ruh ïa ki paiñkhana bad ka ïing shet ja (Kitchen), kaba long ki jingdonkam kiba kongsan na ka bynta ka jingbit jingbiang jong ki khynnah bad ki nonghikai.
Ha ka Thiepdiengngan Deficit Lower Primary School pat ka la lap ba ka jinglong jingman jong ka jingteu ba skul kam pat biang ban pynlong ïa ki klas ha ka rukom kaba bit ba biang na ka bynta ki khynnah. Nalorkata, ka skul ka dang duna ïa ki paiñkhana bad kam don satia ïa ka umbam umdih. Ka seng ka la pynpaw ruh ïa ka jingdonkam ban thung noh ïa u/ka nonghikai ha katei ka jaka kaba dang thylli, khnang ba kan ym ktah ïa ka jingbteng jong ka jinghikai jong ki khynnah.
Namarkata, ka seng ka pynpaw ïa ka jingsngewkhia halor kine ki jingduna, namar ba ka jingdon ki jingtei bad ki jingdonkam kiba biang ha ki skul ka long kaba donkam haduh katta katta na ka bynta ka jinghikai bad ka lawei jong ki khynnah.
Ka seng ka kyntu ïa ka tnat Pule Puthi bad ki bor sorkar kiba dei peit ba kin shimkhia ban pynbiang noh ïa ki jingdonkam baroh hapoh kane ka skul, khnang ba kane ka skul ka lah shisha ban ai ka jingshakri kaba bha ïa ki khynnah kane ka dong ka thaiñ.