Katba ka sorkar kam pat pynurlong ïa ka jingdawa ngin ym sangeh ïa ka jingïakhih
Mairang, Naiwieng 18: Ka synjuk ki nonghikai jong ki skul deficit jong ka jylla kala tip kum ka Khasi Jaiñtia Defficit School Teachers Associtiation ha kylleng ki bynta hapoh ka jylla ki dang ïai bteng jingïakhih jong ki haduh mynta ka sngi.
Ki nongïalam bad ki dkhot jong katei ka synjuk kiba hap ha ka Mairang zone Eastern West Khasi hills district ki la pynlong ïa ka jingïakhih ha phyl;law jong ka Tirot Singh Memorial hall kaba don ha ka shnong Pyndengumïong ha kaba da ki spah ngut ki nonghikai ki la wan ban ïashim bynta.
U babu Jopstone Nongneng vice president ka KJDSTA Mairang zone haba ïakren bad ki ladpathaikhubor ha katei ka jaka u la ong ba ha kine ki khyndiat sngi ba la dep na ka liang u Conrad Kongkal Sangma Myntri Rangbah ka jylla u la pyntip sha ki nongïalam ka central body ba un khot ïakren ha kane ka sngi balang ka 18 tarik Naiwieng hynrei hynnin ka miet u la pyntip pat ba na ki daw bym lah kiar yn hap ban pynsageh shuwa ïa katei ka jingkhot ïakren, Kumta na ka liang jong ki nonghikai kim ban se ban bteng biang ïa ka jingïakhih jong ki namar katei ka jingpynsangeh ka pyni ba ka sorkar ka ñiewbeiñ ïa ki nonghikai defficil skul.
U bah Nongneng u la ther tyngeh ruh ïa ka jingkren laplah jong u bah Prestone Tynsong da kaba kynnoh ba ki nonghikai deficit skul ki dei tang ki kruiñ ha kaba u la long ba lada ka sorkar ka ñiew ïa ki nonghikai defficil skul ba ki dei tang ki kruiñ balei kam pyduh noh ïa baroh ki deficit skul ha ka jylla.
Ha kajuh ka por u la ong ba lada ka sorkar kam khot ban ïakren bad pynurlong ïa ka jingdawa jong ki kin dang ïai bteng ïa ka jingïakhih bad ka lah ruh ban pynsageh ïa ka Final Exam jong ki class X ka ban sa long ha ki bnai ban wan.
Shuh shuh u la ong ba ha ki taïew ban wan ka central body kan sa pynlong biang ïa ka jingïalang ban ïapyrkhat kumno kin leh lada ka sorkar kam sngap ïa ka jingdawa jong ki.