Da ka VBYP 2026-2027 District Level pynlong ka St. Xavier’s College, Umoid

0

Mawkyrwat, Naiwieng 18: Ka St. Xavier’s College, Umoid, ha ka jingïatreilang bad ka My Bharat Kendra, Nongstoiñ, ka la pynlong ïa ka Viksit Bharat Youth Parliament 2026-2027 District Level jong ka South West Khasi Hills District, halor ka phang “Nasha Mukt Yuva Viksit Bharat”.
Ha kane ka prokram la wan ïashimbynta, da ki samla pule jong ki ar tylli ki kolej, kata ka St. Xavier’s College, Umoid, bad ka Sngap Syiem College, Mawkyrwat.
Ha kaba kut jong ka jingïakop, ka Idaaibakor Marthong ka la ïoh ïa ka kyrdan ba nyngkong, katba ka Befealty Kharnaior ka la ïoh ïa ka kyrdan ba ar, bad ïa ka kyrdan ba lai la ïoh da u Tyngshaiñlang Kharwanñiang ha kaba kine baroh lai ngut ki dei na St. Xavier’s College, Umoid.
Kine ki nongjop kin sa mihkhmat ïa ka South West Khasi Hills District ha ka jingïakop ha ka kyrdan State Level, kaba long ka kabu ksiar ïa ki ban pyni ïa ka sap bad ka jinglah jong ki ha ka rynsan jong ka Youth Parliament.
Ha kane ka jingïakop, ki nongbishar (Judges) ki la wan mihkhmat na ki tnad bapher bapher, kiba kynthup ïa ka Dr. Alicia Shylla, AYUSH Medical Officer na ka tnad ka koit ka khiah, ka WPSI Moon Arengh na ka tnad Pulit, u bah Tennyson Ronghang, ARO Planning na ka ophis Deputy Commissioner, u babu Victory Paul Bassaiawmoit na St. Xavier’s College, Umoid bad ka Banjoplyne Lyngdoh na Sngap Syiem College, Mawkyrwat.

Leave A Reply

Your email address will not be published.