Ther ka JNC halor ka jingkren beiñ u Bah Prestone Tyngsong bad ka sorkar NPP

Halor ka jingïakhih ki nonghikai skul

0

Khliehriat Naiwieng 17: Ka Jaiñtia National Council Central Executive Committee, lyngba u General Secretary, u bah Wanshwa Suting, ka la pynrem jur ïa ki jingkren laoplah jong u Symbud Myntri rangbah ka jylla, u bah Prestone Tynsong uba la kren pyrshah ïa ka jingiakhih jong ki nonghikai skul deficit bad ka seng ka pynpaw ka jingsngewkhia kaba jur halor ka jingkren beiñ ïa ki nonghikai ha kaba la kynnoh ba ki dei tang ki kruiñ, ka seng ka pynrem jur ïa kane ka jingkren beiñ kane ka sorkar ba la lamkhmat da ka NPP.
U General Secretary, Bah Wanshwa Suting, u la buh jingkylli ïa u symbud Myntri Rangbah ka jylla halor ki kyntien ba la kren, khamtam eh ïa ka jingong jong u ba ki nonghikai kiba ïakhih ki dei ki “kruiñ” bad ki sohpyut.
“Phi dei mano, ba phin khot ïa ki nonghikai jong ngi da ki khñiang kruiñ ne ki soh kiba pyut? Kumno phi nud ban pyndonkam ïa kum kane ka ktien pyrshah ïa kito kiba la aiti ïa la ka jong ka jingim ban saiñdur ïa ka imlang sahlang jong ngi? Kum kine ki jingkren ki long ki bym lah ban pdiang bad kim don jaka ha ka imlang sahlang kaba ithuh ïa ka burom bad ka jingnoh synniang jong ki nonghikai jong ngi” Ong u Wanshwa Suting.
“Ka JNC ka la ïohi shuh shuh ba ka Sorkar ba la ïalam da ka party NPP ka paw ba ka la klet noh ïa la ki jong ki tynrai, uwei pa uwei u nongsynshar, u heh sorkar bad u nongmihkhmat paidbah u la long shisien u khynnah bad u samla pule bad ha lyndet jong ka jingpule, ki kyrdan pule bad ki kyrdan ba mynta jong ki ba ki ieng ki nonghikai kiba la ialam bad pynwan dur ïa ka lawei jong ki, u nonghikai u lah ban nym long satia uta u heh sorkar ne u ophisar IAS, u myntri ne u riew saiñ pyrthei, hynrei kito kiba bat ïa kum kine ki kyrdan mynta baroh ki la dep iaid lyngba na ki kti jong ki nonghikai” pynpaw ka JNC.
“Kaei kaba phi la leh lane kane ka Sorkar ka la leh aiu kaba lah ban ianujor bad ka jingnoh synniang jong ki nonghikai jong ngi ha kaba tei ïa ka imlang sahlang bad pynwan dur ïa ka pateng?” bynrap u General Secretary bad u la buh ruh ka jingkylli da kaba bynrap ba ïa ka roi ka par jong ka jylla ym lah ban thew tang lyngba ki surok, ki jingtei bad ki projek pynroi, ka nongrim ba shisha jong ka imlang sahlang kaba kiew shaphrang ka shong ha ka jingnang jingstad bad ki nonghikai ki long napdeng ki nongtei kiba kongsan tam jong ka.
“Ka JNC ka la buh jingkylli shuh shuh, da kaba ong hato kane ka dei ka rukom pyrkhat kaba ka sorkar ka thmu ban pynheh pynsan ïa ka pateng ka ban wan jong ki nongïalam, ki nongsynshar bad ki nongtrei sorkar, ki heh sorkar ha Meghalaya, kumno ka jylla kan angnud ban pynmih shuh shuh ïa ki ophisar IAS, ki heh sorkar bad ki riew shemphang kiba pawnam haba kito kiba la shaniah ban synshar ïa ka ki paw ba kim kheiñ snep ïa ka burom jong ki nonghikai hi kiba don ka jingkitkhlieh ban pynwan dur ïa ki jingmut jingpyrkhat jong ki samla pule?
Ka Sorkar kaba khlem ithuh ïa ka jingdonkam jong ki nonghikai jong ka dei ban bishar bniah ïa lade shaphang ka jingkitkhlieh jong ka ban tei ïa ki pateng ban wan jong kane ka jylla”
“Ka seng ka la pynpaw ïa ka jingsngewsih ba ha ka jaka ban iatreilang ha ka rukom kaba dei bantei bad ki jingeh jong ki nonghikai kiba ïadei bad ka jingshakri bad ka penshon bad ban trei na ka bynta ka jingpynbeit ïa kaba don jingmut, kum u riew rangbah jong ka Sorkar uba la jied ïa kum katei ka ktien ka pyni ïa ka jinglong khynlung u nongïalam. Ha ka por ba ka Jylla ka dei ban pynkhlaiñ ïa ka rukom hikai bad ban weng ïa ki jingeh jong ki nonghikai, kum kine ki jingkren ki pynjylliew tang ïa ka jingïapher hapdeng ka Sorkar bad kito kiba shakri ha ka liang ka pule puthi”
Na ka liang ka JNC, ka dawa na u Symbud Myntri Rangbah ka jylla, u Prestone Tynsong ba u dei ban panmap paidbah khlem jingteh kyndon sha ki nonghikai bad ba ka sorkar ba la ïalam da ka party NPP kan ai ïa ki lad ki lynti kiba skhem, kiba la buh por ïa ki jingdawa ba dei hok jong ki nonghikai deficit na Khasi-Jaiñtia bad Garo Hills, pynpaw ka JNC.

Leave A Reply

Your email address will not be published.