Shillong, Naiwieng 17: U Myntri Rangbah ka Jylla, u Conrad K Sangma, u la pyllait paidbah ïa ka MeghGo, kaba dei ka state Unified Mobility Platform ha ka prokram kaba la long ha U Soso Tham Auditorium ha ka jingïadonlang u Symbud Myntri Rangbah ka Jylla, u Sniawbhalang Dhar bad ki ophisar na ka tnad transport department.
Ha ka jingkren u Myntri Rangbah ka Jylla, u Conrad K Sangma, u la ong ba ka jingpynlait paidbah ïa ka MeghGo, ka Meghalaya’s Unified Mobility Platform, ka pyni ïa u mawjam ba kongsan ha ka jingïaid lynti jong ka Meghalaya ban pynthymmai ïa ka leit ka wan.
“Kane ka mobility app kan kyrshan ïa ki nongñiah kali na ka thaiñ ka ban ai ïa ka app platform khlem jingsiew na ka bynta ki nongñiah taksi kynthup ïa ki kali auto bad ki kali ar shaka ban pynbun bad pynsuk ïa ka jingïoh lad na ka bynta ki nongleit nongwan,” u la ong da kaba bynrap ba ka thong ba kongsan ka long ban pynbha ïa ka jingtreikam katba pynthikna ïa ka jingïoh lad bad kaba ryntih na ka bynta ki nongjngohkai pyrthei bad ki nongshong shnong trai ri.
Haba kren halor ka jingpyniasoh bad jingpynbha ïa ka app ha ki por ban wan u Myntri Rangbah ka Jylla u la ong ba ki liengsuin ki dang iaid ban pyniasoh ïa ka app bad ki 3000 tylli ki homestay ba la bei tyngka da ka sorkar ban thaw ïa ka lad ban buh jaka sah ha kawei ka jaka na ka bynta ki nongwan jngohkai pyrthei.
U la ai jingmut ruh ban pyniar ïa ka jingpyndonkam jong ka platform ban kynthup ïa ki mar rep da kaba pynïasoh ïa ki nongrep bad ki kali kit mar.”Ka don ka jinglah wat ban pynïasoh ïa ki kali cold storage ha ka app shisien ba ka projek ka la nang kiew,” u la ong.
La khmih lynti ba kane ka rynsan kan thaw ïa ki lad kamai kiba kham bha bad pynkhlain ïa ki lad kamai lyngba ki jingshakri ba pyndonkam da ka technology.
Kane ka rynsan kan pynïasoh nangne shakhmat, ki jingshakri jong ki Taxi, ki jingshakri jong ki Bike taxi, ki jingshakri jong ka jingïaid lynti ba ïasam lang, ki jingshakri kiba dang sdang mardor, ki jingshakri ban kit ïa ki nongjngohkai pyrthei, ki tiket Bus bad ki rukom ai jingtip ïa ki nongleit nongwan.
Ka app kaba kyrshan ïa ka ktien Phareng, Khasi, Garo bad Hindi la shna khnang ban pynlong ain ïa ka leit ka wan ha nongbah Shillong da kaba shai bad ha ka bha ka miat jong ki nongniah kali kaba ai ïa ka rukom treikam ba la peit bniah da ka sorkar na ka bynta ki nongleit nongwan bad ki nongniah kali.
Ki jingpynkhreh ban ïada ki kynthup ïa ka jingïasam ïa ki jingtip ba bniah jong ka jingleit bad ki briew kiba lah ban shaniah, ki jingpynbna ba kyrkieh bad ka jingkyrshan ïa ki nongthied.Kane ka app ka treikam ha ka zero-commission model ha kaba ki nongñiah kali ki siew ïa ka bai subscription man ka sngi kaba long T.15 tyngka na ka bynta ki bike, T.20 tyngka na ka bynta ki auto bad T.35 tyngka na ka bynta ki taksi.Ia kine ki jingsiew la pyniaid da ka sorkar ban ai ïa ka insurance bad ka jingsiew na ka bynta ka jingtrei.