Wat bympat dep ka jingtohkit leit treikam biang ki pulit ba shah sospon bad bteng biang ka lum pisa be-aiñ: KSU
Balei shim por haduh 45 sngi kylli ka KSU
Shillong, Naiwieng 16: Ka Khasi Students Union (KSU) ka la aiti ïa ki sakhi da ki video sha u Magistrate ba tohkit halor ka jingkynnoh lum pisa beaiñ ki Pulit na ki nongñiah trok ha Mawkhanu bad Thangshalai, bad buh jingkylli balei ba ka shimpor haduh 45 sngi ban shim ïa ki jingiathuh bad jingong hynrei bad ban shimkhia mardor ban leh eiei lada dei pyrshah ïa ka KSU ha kino kino ki kam.
Haba kren sha ki lad pathai khubor hadien ba wan na ka jingleit pynsngew ba la pynlong da u Additional District Magistrate u Bah P T Passah MCS ha ka sngi Nyngkong ha ophis DRDA, u General Secretary ka KSU samla Reuben Najiar ula ong ba ïa ka KSU la pynbor ban leh eiei namar ki bor pynïaid ka sorkar kila shu lehklet ïa kane ka kam naduh u bnai Jylliew.
U la ong, “Ha ka 30 tarik Nailur, ka KSU ka la leit sha Mawkhanu bad Thangshlai hadien ka jingïoh pdiang ïa ki jingujpor na ki paidbah ba ka don ka jinglum pisa beaiñ da ki Pulit na ki trok bad ki pickup. Ngi lap ba ka la mih ruh ha ki kot khubor ha ka 8 tarik Jylliew bad ki nongñiah trok ki hap ban siew pisa, na ka bynta u bnai Jylliew haduh mynta, ki bor district bad ki pulit kim shym la leh eiei, kaba pynbor ïa ngi ban leit sha kitei ki jaka.”
Shuh Shuh u nongïalam ka KSU u samla Reuben ula ong ba ki dkhot ka KSU kila poi sha kitei ki ar jaka ha ka por 3 baje janmiet jong ka 30 tarik Nailur bad ring video ïa ki pulit katba ki dang lum pisa ha shuwa ban leit kren bad tohkit ïa ki.
U la ong, “Hadien ba ngi leit sha kitei ki jaka, ngi la lap ïa ka jingshisha bad ngi dalade ngi la lap ïa ki Pulit ba ki lum pisa beaiñ. Shuwa ban leit kren ïa ki Pulit ba don ha katei ka jaka, kila lap ïa bun tylli ki trok kiba ïeng ha katei ka jaka bad hadien ba ki ïeng, kila siew mar T.200 haduh T.500 katkum ka jingheh jong ka trok bad ka mar ba ki kit. Ngi la ïoh ring video bad ngi la aiti ïa ki ha ka hearing kaba la long mynta ka sngi.”
U Samla Najiar u la ïathuh ba ka KSU ka la ai ïa ka jingbatai ba pura ïa ka jingjia bad aiti ïa baroh ki video kum ki sakhi na ka bynta ka jingtohkit kaba la khlieh da u ADC ka East Khasi Hills Bah Peter T. Passah.
Shuh shuh u samla Reuben ula ïathuh ka khlem leit ujor khnang ïa ka ejahar bad ong, “Na ka liang jong ngi, ngim kwah ban ujor ejahar namar ngi ong ba ki Pulit kin tohkit ïa ki Pulit kan ym don jingmut ïa ng, na kata ka daw ngi la thoh sha ka Sorkar ban thung ïa ka jingtohkit kaba laitluid. Halor kane, kim shym la leh eiei, hynrei kila thung ïa ka jingtohkit Magistrate ba la khlieh da u Bah Passah, ADC ka EKH.”
Ula pynpaw ruh ïa ka jingbynniaw halor ka jingpynslem ïa ka jingkhot ban tohkit. “Kane ka jingjia ka la jia ha ka 30 tarik Nailur, bad ka la shimpor 45 sngi ban ai ïa ka statement. Ngi shem ba lada dei ba don kano kano ka jingjia pyrshah ïa ka KSU, kin wan mardor, hynrei haba poi sha ka jingtohkit ïa ka jingleh bakla ki Pulit, ka shimpor ïa ki haduh 45 sngi,” ula bynrap.
U samla Reuben ula ïathuh ba u SP, ka East Khasi Hills Bah Vivek Syiem ula kam ba katto katne ki Ophisar kila shah sospon, hynrei ka jingpynshitom ka long kaba da jied bad kaba neh tang shipor.
U la ong, “Ngi la lum jingtip ba u SP ka EKH, ha katei ka por ula pyntip ba katto katne ki Ophisar bad ki Pulit kiba lum pisa beaiñ kila shah sospon, hynrei kane ka don arbynta-ka don ka Mawkhanu kaba hap hapoh ka Diengpasoh Outpost bad Thangshalai kaba hap hapoh ka Mawryngkneng Outpost. Kito kiba shah sospon bad shah weng ki dei tang kiba na Diengpasoh, hynrei ngim shym la ïohi eiei haba phai sha ka Mawryngkneng Outpost.
Kaba sniew shuh shuh ka long, kito kiba briew ïa kiba la ong ba kila shah sospon shipor kila leit trei biang mynta. Ngim sngewthuh ba kumno ki lah ban leit trei biang haba ka jingtohkit kam pat dep. Lehse ka lah ban dei ka jingtohkit ba malu mala jong ki Pulit bad lehse ha kane ka jingtohkit ym shym la shem ba ki leh ïa kano kano kaba bakla, bad kumta la shah ïa ki ba kin leit trei biang ïa ka kam”.
U samla Reuben ula ïathuh ba ka jinglum pisa beaiñ kam pat sangeh satia wat hapdeng ka jingtohkit. “Ha kine ki khyndiat sngi, ngi la ïoh pdiang biang ïa ka jingujor ba kane ka jinglum pisa ka la ïaid beit ha kine ki jaka ha Shillong By-pass bad ha kiwei ki district ruh kumjuh ki dang ïaid ha kajuh ka rukom,” la bynrap u Najiar.
U la ong, “Na ka liang jong ngi ka KSU, ngi maham bad dawa ïa ka Sorkar ban khmih biang ïa kane ka kam, namar ka jinglum pisa beaiñ da ki Pulit na ki trok ka pynjynjar ïa ki paidbah baroh namar ka wanrah ïa ka jingkiew dor ki mar ki mata. Ngi la thoh man ka por sha ki bor district, sha ki pulit, sha u Myntri, hynrei naba ngim ïohi ban don ka jingseisoh, ka seng kan shim da kiwei pat ki sienjam kiba kham tyngeh.”
Ula dawa ba dei ban pynsted ïa ka jingtohkit bad ba ïa ki pulit ba kynnoh donkti bad ïa ki nongñiah trok ruh dei ban khot hajir. “Ha ka jingïakren mynta ka sngi, ngi ong ba dei ban pynsted ïa kane ka jingtohkit. Ngi kwah ba naduh nangne shakhmat, ki Pulit kiba la donkti bad ki nongñiah trok ruh ki dei ban shah khot hajir,” ula dawa.
Haba kylli la ka KSU ka dang kwah ban weng ïa u SP, u samla Reuben ula ong ba kan nym don satia ka jingtohkit kaba khuid katba u Ophisar ba shah kynnoh u dang khmih hi ïa ka kam. “Kumno ka jingtohkit kan long kaba khuid haba don ka jingkynnoh pyrshah ïa u SP?” ula ong. “Lehse na ka liang jong ngi ka dang dei tang ka jingkynnoh, hynrei ha ka jingsngewthuh jong ngi, ka kam ba ngi leh ha ka 30 tarik Nailur kam dei satia kaba dang thymmai ba ki Pulit kim don jingtip halor kane ka kam bad ka jingjia.”