Pynlong Mock Drill ka DDMA ban ïada na ka jingkhih jumai
Jowai, Naiwieng 16 : Ka District Disaster Management Authority (DDMA), West Jaiñtia Hills, haka jingtreilang ka ophis u Superintendent of Police, ka District Medical and Health Officer, Fire and Emergency Services, Civil Defence bad Meghalaya Police Radio Organization (MPRO) kila dep ban pynlong ïaka District Level Mock Drill kaba ïadei bad ka jingpynkhreh lada wan khih u jumai.
La pynlong ïa kane ka (Mock Drill) haka ophis jong ka District Transport Office, la pynkhreh ruh ïa ka Mihmyntdu UPHC kum ka jaka ai jingsumar, katba ïa ka madan ïalehkai Kiang Nangbah la buh kum ka jaka ai jingïarap ba kyrkieh.
U ma Darimi Lyngdoh, District Disaster Management Officer, Jowai ula pynshai ba ka tnad treikam jong ki kala long kaba la pynkhreh nadong shadong lada wan kano kano ka jingkhih jumai bad ki lad jingïarap ha ki jaka ba shah lynshop mariang.
Kane ka Mock Drill kala ïarap shibun eh bad ai jinghikai halor kumno ban leit ïarap ïa ki briew kiba shah ktah bad ai jingsumar mar mar haka por kaba biang.