Ïasoi soskular ka tnat Ïada ri ban peit ïa ka bha ka miat jong ki riewtymmen kiba sah ha ki jaka Cantonment
Shillong, Naiwieng 16: Ka tnat Ïada ri bad ka tnat ba peit ïa ki riew tynmen ki la ïa soi ïa ka soskular ban pynbha shuh shuh ha kaba peit ïa ki riew tymmen kiba sah ha ki jaka jong ka Cantonment kiba don ha kylleng ka ri.
Da kane ka jingïasoi ïa ka soskular yn lah ban peit ïa ki riew tymmen ha ka por sngi bad ha ka juh ka por ban ai jinghikai, ïa ka soskular la soi ha kaba la sakhi lang u Myntri Ïada ri u Rajnath Singh bad u Myntri ba peit ïa ka bha ka miat ki riew tymmen Dr Virendra Kumar.
U Myntri Ïada ri u Rajnath u la ong ba kane kam dei tang ba ki ñiew ïa ki kum kiba haïing ha sem, hynrei ka pyni ïa ka jinglong tynrai ka jingïakit ïabah lang ha ka imlang sahlang bad lyngba ka jingsngewthuh ka jong ka kan ïalam ïa ka ri kham sha jrong ha kaba yn sa rakhe ïa ka jingdap 100 snem ka jinglaitluid ha u snem 2047.
Katba ka jingkyrshan ïa ki riew tymmen la dang pynbha na ka por sha ka por hynrei dang don kam pat ban dang kham pynbha na kaba la don bad ha ka juh ka por u la ong ba kin peit hangno dang don kam ban pynbha shuh.
Ha ka jingkren u Myntri ba peit ïa ki riew tymmen u la ong ba ka dei ka kam ka jingki ban dang pynbha ïa ki lad ai jingsumar kynthup ïa ka Atal Vayo Abhyuday Yojana (AVYAY), kane ka long ban kham pynbha ïa ka jingim jong ki riew tymmen.
Kane ka soskular kaba kila ïa soi mynta ka sngi kan ïarap ïa ki riew tynmen kiba shong ba sah ha ki jaka kiba hap ha ka jingpeit jong ka Cantonment ba kin ïoh ïa ka jingsumar kaba bha la ong ba ki riew tymmen ki don ïa ka jingshem phang.
Ha kane ka sngi la don lang u Rajesh Kumar Singh u Secretary ka tnad Ïada ri u secretary ba peit ïa ki riew tymmen u Sudhansh Pant, ka Director General, ka tnad Ïada ri ka Shobha Gupta bad kiwei ki heh sorkar ki la donlang.