Shillong, Nailar 01: Ka MP jong ka Trinamool Congress ha Lok Sabha, ka Kakoli Ghosh Dastidar, mynta ka sngi ka la rah da u Sohbaingon ïong ha ka por ba long Dorbar bad ka la shrut ruh artad thrup ha ka por ba dang kren ban pyrshah ïa ka jingkiew dor ki mar ki mata bad khamtam eh ïa ka jingkiew dor ka Gas Shet jingshet.
Kane ka la jia hadien ba u Shongknor ka ïingdorbar, u la ai lad ïa ki Liang Pyrshah ban ïakren bad ïatai halor ka jingkiew dor ki mar ki mata khamtam ki marbam kaba ki Liang Pyrshah ki la ong ba ka la ktah shisha ïa kiba duk ba suk.
“Hato ka sorkar ka kwah ïa ngi ba ngin ïa bam da u jhur im, haba ka la pynkiew dor ïa ka gas shet jingshet”, ka la ong bad shrut artad ïa u sohbaingon ïoh ba ka la rah.
Ka la ong ba ka dor jong ka Gas shet jingshet, ka la kiew haduh saw sien ha kine ki khyndiat bnai baladep, kata na ka 600 tyngka sha ka 1,100 tyngka. “Ka sorkar kadei ban pynhiar noh shisyndon ïa ka dor’, la ong ka Kakoli kaba shong marjan bad ka paralok MP na ka TMC, ka Mahua Moitra.
Kane ka jingïatai halor ka jingkiew dor ka la wan hadien ba ki Liang Pyrshah ki la pynthut ïa ka ïingdorbar Parliament, ha kaba la hap ban pynsangeh bunsien. Halor kane ka jingpynthut ba bunsien ïa ka jingïashong dorbar, saw ngut ki MP jong ka Seng Congress ki la shah sospon na ka bynta ka jingïa shongdorbar.
