Shillong, Nailar 01 : U Symbud Myntri Rangbah ka jylla, Bah Prestone Tynsong u la kyntu ïa ki nongïalam ka HYC ba kin kynduh noh ïa u Director jong ka Meghalaya Power Distribution Corporation Limited (MePDCL) khnang ba kin ïoh jingshai shuh shuh haba ïadei bad u smart meter.
Na ka liang u general secretary ka HYC, Bah Roykupar Synrem la ïathuh ba katei ka jingkwan kynduh jong ki ïa u Symbud Myntri Rangbah kadei namar ka jingïapher ka dor ba u pyntip lyngba ki lad pathai khubor da kaba ong ba u single phase smart meter u shong dor 5889 tyngka katba u three phase smart meter pat u shongdor 11,238 tyngka.
La ïathuh ruh ba ka sorkar jylla ka la dep mang haduh 197487 tylli ki single phase meter bad 2513 tylli ki three phase meter kaba katkum ka jingkhein jong ka seng da katei ka dor ba ki ïoh ka la poi 119 klur tyngka katba katkum ka kaiphod RTI pat ki ong ba ka kdew ba ïa katei ka projek la pyntrei ha ka jinglut kaba kot 232 klur tyngka.
“Kumta ngi la kylli ïa u Symbud Myntri Rangbah ban pynshai shaphang katei ka kontrak kaba la poi tam 113 klur tyngka haba ka dor kaba u ai jubab ha ka Iing Dorbar ka long 119 klur tyngka,” la ong u Bah Roykupar.
Halor kane, utei u General Secretary ka seng u la ïathuh ruh ba na ka liang u Symbud Myntri Rangbah ba peit ruh ïa ka tnad Bording ba un pynshisha ïa ka jubab jong haba ïadei bad ka dor ka jingpyntreikam ïa ki smart meter ha ka jylla namar ka jubab bad ka jingkheiñ kadei kaba la pynkhreh da ki ophisar jong ka tnad Bording.
U la ïathuh ruh ba na ka liang u Bah Prestone u la phah kynduh ïa ki bad Director ka MePDCL ban ïoh jingshai shuh shuh haba ïadei bad kiwei pat ki mat kiba ïadei bad katei ka kontrak smart meter kaba la tam 113 klur tyngka.
