U Dr. Kharlukhi un ym wan tang marwei, bun ki nongïalam kin pynïasoh sha ka Congress: Pala

Shillong, Naiwieng 13: U President ka Congress, u Bah Vincent H. Pala, ha ka sngi Thohdieng, u la ong ba ka jingkyrshan jong u MP barim ka Rajya Sabha u Dr. Wanweiroy Kharlukhi ka long kham palat ban ïa ka jingkyrshan shimet – ka wanrah ïa kynhun baroh kawei jong ki nongialam ha ka party ha shwa ka elekshon shiteng samoi jong ka Shillong Lok Sabha.
Haba kylli halor ka rai jong u Kharlukhi ban kyrshan ïa u, u bah Pala u la ong ba ka jingwan jong u president barim ka jylla ka NPP kan nang ai bor ïa ka seng Congress.
“Da ka jingkyrshan jong u Dr. Kharlukhi ngin sa iohi ïa ka jingkiew ha ka party”, la ong u bah Pala.
U la kdew ïa ka jingïaid lynti jong u Dr Kharlukhi ha ka saiñ hima sima, naduh ka jinglong nongïalam jong ki samla pule haduh palat lai phew snem ha ka saiñ hima sima kaba treikam, kynthup ïa ki 18 snem bad ka NPP.
“U don ka jingshemphang ha kine ki 30 snem tam ha ka sain pyrthei bad 18 snem ha ka NPP bad u la long u nongialam jong ki samla pule”, la ong u Pala.
“U dei uba la tip bad uba leh bha bha ha ka balang, u dei ruh u nongialam na ki seng bapher bapher bad kawei kaba kongsan ka long ba u long kaba uba khuid ha ka sain pyrthei”, u la ong.
“Ym tang ma u marwei, ynda u la wan te bun ki nongialam jong u ki la iasoh bad ngi”, la ong u Pala.”Nga la ïohi ym tang ha Jowai hynrei wat ha Ri War bad ha kylleng ka ri Khasi bad Jaiñtia ki la ïasoh lang bad ngi.”