Ka jylla Meghalaya ka don ïa ka Budget kaba 39 hajar klur tyngka na kane 42 klur tang ban siew ram: Pala

Jowai, Naiwieng 13: Ka Indian National Congress (INC) mynta ka sngi Thohdieng 13 tarik u Naiwieng, 2026 kala pynlong ïa ka jingïalang paidbah ha Ïawmusiang Stand Ummulong Jowai, shi bynta ban ïalap By-Election MP Lok Sabha ïa u kyrtong ka Party u ma Vincent H. Pala.
Ha kane ka sngi la wan ban synran lang ïa u ma Vincent H. Pala da u MP barim ka Rajya Sabha u Dr. W. R Khrlukhi, u MDC ka JHADC ma Madonbai Rymbai, u Rikut Parein (MDC), u General Secretary WJHDCC ma E.G War, u ma Emlang Laloo uba dei u President Nartiang BCC, nalor kiwei.
Na ka liang u ma Vincent H. Pala haba ai jingkren sha ki paidbah ula pynsngew ïa ki kam kiba ula leh ha ki por ba u dang long u MP ka Lok Sabha na ka 1st Shillong Parliamentary Constituency, ha kaba ula kdew shibun ki kam pynroi kiba la wanrah shapoh ka jylla Meghalaya.
Ula ong donkam ban don ka jingïatylli namar ki MP ha ka Lok Sabha ki don 543 ngut, ki MP Rajya Sabha 236 ngut lem bad ki Nominated, ula kynthoh jur ba ka BJP ka la wanrah ïa ki Bills ba bun jait kiba long pyrshah ïa ki Khristan bad kiba noh shilliang ban ïakhun ïa kane baroh dei tang ka Party Congress, da kaba ong ha u snem 2029 ynda ka Congress kan wan ha ka bor yn pynduh pyndam noh ïa kitei ki Bills pyrshah ïa ki Khristan.
Sa kawei ka Bills ka dei ka Uniform Civil Code (UCC) ha kaba ka sorkar BJP ka la pyrshang ban wanrah bad kane ka aiñ kaba buh jingeh ha ka shongkha shongman bad ka jinghiar pateng jong ka riti dustur, ong shuh shuh u ma Pala.
Ula ong ba ka jylla Meghalaya ka don ïa ka Budget kaba 39 hajar klur tyngka na kane 4200 klur tang ban siew ram, hynrei ki khajna (Tax) bala ïoh lum ka long 4700 ha ka shisnem bad tang 500 klur la ïoh ban pyndonkam, ka pisa ba bun dei kiba wan na ka sorkar kmie, kane ka paw ïa ka jinghiar jong ka ïoh ka kot, ula ong kino kino ki kam la shim beit da ka ram bad kane ka lah ban ktah ïa ka lawei jong ki khun ki kti hadien.
Kumba long mynta u ong ka sorkar India ka hap ban siew haduh 200 lak klur tyngka tang ka ram, ka Interest kaba long 14000 hajar klur, 26% na ka jingpyllut ka Ri la hap ban siew tang ïa ka ram bad kane ka paw ba ka Ri katba nangslem ka la nang duh namar ka pisa kam leit sha ki paidbah.
“Mynshwa da ki hajar kiba ïoh kam Contractor hynrei mynta la ïoh tang da uwei u briew uba don haka bor, ym don shuh ka jingbhah ïa ka pisa kumba paw mynta kiba ïoh kila nang ïoh kiba duh ki nang duh” ong ma Pala kane ka dei ka policy treikam ka sorkar.
Kum ki nongshong shnong dei ban tip ïa ka hok da kaba ai ka jingkyrshan pura ïa ka Congress, ula ai nuksa ka BJP kala pyndonkam da ki juh ki nongthep vote sha kiwei de ki jylla tang ban ïoh jingjop, hadien ba ka Congress kala lap ïa kane ka jingleh tuh ha u snem 2029 kim nym ïoh lad shuh.
Halor ka By-Election hapoh ka jylla ula ong lada phi thep sha ka NPP ka long kumba phi thep sha ka BJP bad lada thep sha sah kiwei de ki Party kam don jingmut eiei.
Kum u kyrtong MP u kyrmen skhem ba ka Congress kan poi haka bor synshar naduh u snem 2028 shaneng namar ka jingjop ka Congress kan long ka jingkyrmen ïa ki nongshong shnong ka Ri, kumta u pan ka jingkyrshan ïa ka Party da kaba pynjop don burom ïa u ha kane ka kynti khnang ban ïoh treikam na ka bynta ki paidbah.