Shah die tat dor ki jaka jong ki trai ri ha Umkyrpong sha ki kompani bar jylla: JNC-CEC

Khliehriat Naiwieng 12: Ka Jaiñtia National Council JNC Central Executive Committee (JNC-CEC) hapoh ka jingialam u President u bah Sambormi Lyngdoh,mar mar hi, mynta ka sngi ka leit ban la aiti da ka jingthoh sha u Commissioner & Secretary jong ka tnad Revenue and Disaster Management Meghalaya ha kaba ka seng ka la pynpaw ka jingsngew khia halor ka ka jingiakylliang jaka lane ka Land transfer ïa kawei ka jaka kaba heh kaba don haduh kumba 232.899 hektar (2,328,990 square metre) kaba hap haka shnong Umkyrpong, Elaka Sumer, East Jaiñtia Hills District, ka seng ka la kynnon ruh ba kane ka paw ba ka la don ka jingia die tat dor ia ki jaka jong ki trai ri sha ki company bar jylla.
Lyngba ka dorkhas ba la buh mynta ka sngi, ka JNC ka la kyntu jur ïa ka tnad revenue ba dei ban pynsangeh noh mardor ïa ka jingthmu ban pynkynriah bad kano kano ka mang tyngka lane ka sanction kaba dang sahteng tat haduh ban da dep ban bishar bniah ia ki jingeh ba la pynpaw katkum ka jingthoh, ka seng ka kyntu ruh ïa ka tnat ban bthah ïa u Deputy Commissioner ban pynjlan ïa ka lad ne ka lynti jong ka Form-D na ka bynta ka por ba biang. Pynthikna ruh ban pynmih kham bun ïa ki jingpynbna lyngba ki kot khubor jong ka thaiñ bad kiwei kiwei ki jaka paidbah kiba lah ban ioh khnang ban pynmyntoi ïaki trai ri.
“Lada ki briew jong ngi hi ki mon bad ki lah ban thied ïa kine ki jaka ha ka dor ïew kaba biang, balei kin shah pynduh ïa kata ka lad tang namar ba kim shym la ioh jingtip kaba biang?
Kine ki jaka ki dei kiba don u marpoh khyndew jong ki briew jong ngi kiba shongdor da ki klur tyngka, hato kan jia aiu ïa ki pateng jong ngi lada ïa kum kine ki jaka kiba don ha ka ka jingkyrmen ha ioh ka kot bad kiba ai jingmyntoi ïa ngi, khlem da ailad shwa ïa ki briew jong ngi hi?” ong u President ka JNC u Sambormi Lyngdoh.
“Ka JNC, ha kine ki sngi ba la leit, ka la pynpaw ïa ki jingeh kiba jur ha kaba ïadei bad ka jingthmu ban pynkylla ïa ki jaka jong ki riewlum sha ki company ba nabar jylla, kynthup ïa ka Shree Cement Limited, hynrei kumba ïuh tdong bseiñ la mih biang sa ka kawei kaba ha Umkyrpong kaba ha ka juh ka jinglong hi kaba ïadei bad ka kam pynkynriah jaka. Kane ka jingthmu ban pynkynriah jaka kaba dei jong u Wom Chyrmang uba na ka Shnong Jalaphet, East Jaiñtia Hills District ba la thmu ban ai lane transfer sha ka “Kopili Cement (I) Private Limited” kum ka nongthied ïa ka tei ka jaka kaba don ha ki ar tylli ki jingpynbna Form-D ba la pynmih da ka ophis jong u Deputy Commissioner, East Jaiñtia Hills District. Kitei ki jaka ba la buh lang ha ka notice la pyni ruh ïa ka dor jong ki jaka kiba long kumba ?11.88 klur tyngka na ka bynta ki ar tylli ki parcel” ong u kyrwoh.
“Ka JNC halor kane ka bynta ka la dep ruh ban pynpaw hakhmat u Deputy Commissioner lyngba ka jingthoh ba la dep buh myn ha ka 8 tarik u bnai risaw 2026, da kaba kyrpad ba dei ban pynjlan ia ka jingtreikam, ban pynjlan ruh ia ka lad halor ka Form-D bad ban ai jingpynbna paidbah kham bniah khamtam ha ki khubor local katkum ka kyndon jong ka MLTR Rules 1974″
‘ Ka JNC ka sngewkhia jur ïa ka jingthmu ban pynkylla ïa kum kane ka jaka kaba heh bha jong ki trai ri trai muluk sha ka kompeni shna cement kaba ka Council hi ka shim ba ka long kaba khlem nongrim bha, khamtam haba kheiñ ïa ki marpoh khyndew kiba lah ban don daki klur tyngka”.
“Ka JNC ka la ioh jingtip ruh ba kiwei pat ki trai Ri ki lah don ka jingkwah bad ka jinglah pisa ban thied ïa ki jaka ba la kdew, hynrei khlem ka jingpynsngew bad jingpyntip paidbah kaba biang, kumno kine ki briew kin wan shakhmat bad pyndonkam ïa ka lad?”.
Halor ka dorkhas ba la buh, ka JNC ka kyntu ïa ka ophis jong u Commissioner & Secretary jong ka tnad Revenue and Disaster Management Meghalaya ban leh ïa kaba donkam bad na ka liang ka seng ruh kan sa nang ïai buddien.