Um dei u ‘gunda’ u dei u muktiar, pynshai u Bah Sanbor ïa jingkynnoh ka JAC

Shillong, Naiwieng 12 : U MLA ka Shillong South ba dei ruh u Myntri ka Sorkar Jylla Bah Sanbor Shullai hynne ka sngi Palei u la pynshai ba u samla ba ka Joint Action Committee pyrshah projek ropeway ka kynnoh ba u dei u ‘gunda’ u dei u muktiar.
“Um dei satia u ‘gunda’ kumba kynnoh ka JAC hynrei u dei u muktiar,” ong u Bah Sanbor haba kren bad ki lad pathai khubor hadien ba u la mih na kamra jong u Myntri Rangbah.
Ha kajuh ka por u la ïathuh ba ki bahaiing ki la ujor da ka ejahar ha Laban Police Station pyrshah ïa ka JAC halor katei ka jingkynnoh ‘gunda’ ïa utei u samla. “Ka jingmut jong ka kyntien gunda ka long ba ki hap ban pynshisha la u don ne em ïa ka rekod ha ki pulit. Hynrei ha ka jingshisha um dei u gunda. U dei u nongïasaid aiñ,” u la ong.
U MLA u la pynshai ruh ba ka jingkynnoh jong ka JAC ba utei u samla u dei u Perseonal Security Officer (PSO) jong u ka dei ka bym don nongrim satia. “Um dei satia u PSO jongnga hynrei u dei u muktiar,” la bynrap biang u Bah Sanbor.
Ha kawei pat ka liang, ka Kong Ladaphila Kharphuli ka la ujor da ka ejahar ïa ka Joint Action Committee (JAC), halor ka jingkynnoh ba ki la pynjah burom ïa u khun bad u pyrsa kurim jong ka hadien ka jingïalang halor ka projek ropeway kaba la lum da u Myntri Sorkar bad MLA ka South Shillong, u Sanbor Shullai ha ka sngi Balang ba la dep.
Katkum ka ejahar, la ong ba kane ka la jïa ïa u khun jong ka, u samla Pynhunlang Kharbuli bad u pyrsa kurim jong ka, u Bah Anthony Marwein, uba la tip ruh kum u Bah Bun, hadien ka jingïalang kaba la long ha State Convention Centre , ka jingïalang ba u Bah Sanbor Shullai u la ïakynduh kynthup lang ïa ki dkhot JAC ban ïakren halor ka project ropeway.
Ka ejaharka kynnoh ba hadien ka jingïalang, don katto katne ki dkhot jong ka JAC kiba la pyrshang ban khanglad ïa u Myntri ban mih na katei ka jaka bad pan jubab na u. Ka ejahar ka ong ba u khun bad u pyrsa kurim jong ka ki la mih ban ïada ïa u Myntri hadien ba ki la ïohi ïa ki dkhot jong ka JAC kiba wan hajan da ka jingbitar.
Katkum ka jingong jong ka nongujor, ka jingjia kam shym la kut tang ha kata ka jaka. Ka la kynnoh ba hadien kata, ki khubor ki la pynmih ïa ki video ha kiba ki dkhot jong ka JAC ki la ïai khot ïa kitei ar ngut kum ki “gang” khlem da pyni kano kano ka sakhi sabut.
Ka la kynnoh ruh ïa ki dkhot jong ka JAC ba ki la kynnoh bakla ïa u khun jong ka kum u Personal Security Officer (PSO) jong u MLA, kaba ym dei satia ka jingshisha.
Da kaba ong ba kine ki jingkynnoh ki pynjah burom ïa ka ïing ka sem jong ka bad ïa ka jait Kharbuli hi baroh kawei, ka Kong Kharbuli ka la kyntu ïa ki pulit ban tohkit bniah ïa kane ka kam bad ban leh katkum ka aiñ.