“Down down Paul Lyngdoh, down down Sanbor Shullai bad Rangbah Shnong” pyrta ka JAC ha ka peace rally

Shillong, Naiwieng: Ki dkhot jong ka Joint Action Committee pyrshah Shyllong Peak Ropeway Project bad kiwei pat ki paidbah ki la ïamih na ka jaka ba ki shong kyllaiñ myngor ha u mot Kiang Nangbah kaba ha Barik ban tur da ka jingïaid bajai bajai sha Secretariat ban pyrta ïa ki kyntien pynrem ïa u Bah Sanbor Shullai uba dei u Myntri Sorkar bad u Bah Paul Lyngdoh uba khmih ïa ka Tnat Tourism bad ki la pyrta ba kidei ban hiar shuki, kiba ïaid ïa ka peace rally ki la pynrem ruh ïa ki Rangbah Shnong bad ong ba donkam ïa ka um bad dei ban pyndam ïa ka project bad rah noh shawei bad kine kiba ïakhih bad ïaid rally ki la ïeng ruh hakhmat khyrdop jong ka main Secretariat bad ban rah ruh ïa kiba bun ki placard jingthoh pyrshah bapher bapher.
Ha kane ka jingïaid paidbah na ka liang jong ki nongïalam ka JAC ha shwa ban kin sdang ki la ai ruh ka jingmana ïa kiba shim bynta ba ki dei ban ïaid da kaba jai jai bym dei ruh ban ym pynmih ïa kino kino ki jingkulmar ne ki jingpyndonkam ïa ki tiar kiba mynsaw.
Ïa kane ka peace rally la dang da ka jingduwai ba la ïalam da ka President ka Kong Debora Marbaniang.
Kane ka jingïaid rally ka la kham jur hadien ba ki dkhot jong ka JAC bad kiba shim bynta ha ka jingïaid rally ki la pyneh hi triang ban mih noh na khyrdop jong ka Secretariat bad ha kaba la ïohi ruh ba ki la wanrah da ki mattress ban siang ha surok ba bteng ka jingïakhih jong ki hynrei na ka liang jong ki bor distrik ki la hap ban phah bret noh ïa ki mattress sha shiliang ka surok bad ha ka por janmiet pat bad hangne la ïohi ruh ïa ka jingïaknieh ïa ki mattress bad jingïatynjuh bor, ka jingïakyndang ïa ki jingker nar, hadien ba ki bor pynïaid distrik ki la dep ban pynbna da ka tynghung ïa ki kyndon ba la pynmih da ka ophis Deputy Commissioner ba la mana bad khang pyrshah ban ïalum paidbah hakhmat jong ka khyrdop bad sawdong jong ka Main Secretariat bad ki bor distrik ki la hap ban phah wanrah noh da ki bus ban pynkit bad pynkynriah noh ïa ki sha ka jaka ba ki shong kyllaiñ mynngor kaba don hakhmat jong u dur Mot Kiang Nangbah kaba ha Barik, pyrshah ka Civil Hospital Shillong, watla la ka don ka jingbym kwah satia ba kin hiar noh na kitei ki bus.
Na ka liang kitei kiba ïakhih ki la pynpaw ba kin pyrshah beit ïa kane ka projek bad kumjuh ruh ba kin pynkhlaiñ shuh shuh ki jingïakhih katba ka sorkar kam pat pyndam ne rah noh shawei ïa kane ka projek sha kiwei pat ki jaka kiba donkam shisha ïa ka.