Shillong, Naiwieng 12: Ki pulit jong ka South West Garo Hills ki la ïoh kurup kumba 2000 tylli ki kuli dawai Yaba kiba khia 198.84 gram bad la kem noh ar ngut kiba donkti ha ka por ba don ka jingkhynra ha ka surok Duarapara bad Gopinathkilla ha ka 11 tarik u Naiwieng.
Hadien ba ki la ïoh jingtip shaphang kane, ki pulit kila suba ba don ka jingkhaïi beaiñ ïa kine ki kynja jingdih pynbuaid, kumta kila ïoh kem ïa ka kali ar shaka ba don ïa u nombar ML-08J-3765 kumba 10 baje mynstep.
Ïa kine ki ar ngut ba la shah kem kiba la shong da kane ka kali ar shaka, la tip kum u Saiful Miah ba khot u Sailful Islam ba la tip ruh kum u Sailful Hoque ba la 39 snem ka rta, u Mazarul Hoque bad u Rakifol Miah ba la tip kum u Rakiful Islam ba la tip ruh kum u Choto Baa ba la 29 snem ka rta, ba dei u khun jong u Rup Miah. Kine ki dei kiba na ka shnong Dakhergaon, Kakripara Part-II, kaba hab hapoh ka Mankachar Police Station ha ka jylla Assam.
Ha ka jingkhynra kaba katkum ka aiñ, ki pulit kila ïoh kurup kumba 2000 tylli ki dawai kuli ba suba ba dei ki Yaba na u nongshong hadien jong ka thuk thuk. Kitei ki dawai kuli ba la ïoh kurup ki khia kumba 198.84 gram bad ka jingtest kaba nyngkong ka pyni ba ki don ïa u Amphetamine.
Ïa kitei ki mar ba suba ba dei ki mar beaiñ bad ïa ka thuk thuk kaba la suba ba la pyndonkam ban kit ïa ki, la kurup katkum ki kyndon jong ka aiñ. Ka jingtohkit kaba kham bniah ka dang ïaid shakhmat ha kaba ïadei bad kane ka jingjia.
Ki pulit jong ka South West Garo Hills kila ban biang ïa ka jingkut jingmut jong ki ban ïai bteng ïa ki jingtrei shitom ban ïaleh pyrshah ïa ka jingkhaïi drok bad ban pynlait ïa ka imlang sahlang na ka jingsniew jong u drok bad kumjuh ruh uba la kynrei ha kane ka jylla.
