Lamkhmat u Dhiraj bad ka Kumkum ïa ka wat ïaknieh rung jong ka Recurve; wan ba saw u Devraj ka M’laya

SHILLONG, Naiwieng 12: Ka NTPC Senior National Archery Championship, ba la pynlong da ka Archery Association of Meghalaya hapoh ka jingpeit jong ka Archery Association of India, ka la sdang hynne ka sngi Palei ha madan Siat khnam ha Umsawli.
La wan plie pyrda ïa kane ka lympung da u Symbud Myntri Rangbah ka Jylla u Bah Sniawbhalang Dhar ha ka jingïadon lang u Director ka tnad Sports & Youth Affairs Bah Alertson Nongbri, ka Kong Matsiewdor War Nongbri, ki nongkitkam ka Archery Association of Meghalaya bad ka Archery Association of India lem bad kiwei kiwei ki kynrem ki lyndan, kiba kynthup ïa ki nongïalehkai Padma Shri, Arjuna, Dronacharya bad Dhyan Chand bad ki nongjop takma na ka Asian Games ba dang shen.
Haba ai jingkren ha kane ka lympung u Bah Sniawbhalang ula ong ba kane ka lympung kan ai mynsiem ïa ka pateng kaba thymmai ha ka Jylla. U la bynrap ruh ba kane ka lympung ïalehkai ka dei ka kabu kaba kongsan ïa ka Jylla Meghalaya ban tei ïa ka sap ha ka liang ka seng bad ka jingstad katba ka dang pynkhreh ban pynlong ïa ka National Games ha u bnai Lber 2027.
Haba pdiang sngewbha ïa ki kynhun na kylleng ka ri, u la ong, “Ka Jylla jong ngi ka lah ban long kaba rit ha ka jingbun briew, hynrei ngi long kiba heh bha ha ka dohnud.”
Ha ka wat ïaknieh rung jong ka Men’s Recurve, u Dhiraj Bommadevara na ka SSCB u la wan hakhmat duh da kaba kamai 680 poiñ, bad tam shi point ïa u Parth Sushant Saunkhe na Maharashtra, uba la kamai 679 poiñ. U Arjun Khara ka Odisha u la bud ha ka kyrdan ba lai da 674 point, katba u Devraj Mohaptra jong ka jylla Meghalaya u la wan ha ka kyrdan ba saw da kajuh ka point, ban ai ïa ka kynhun ïa ka jingsdang kaba khlaiñ hala ïing hakhmat ki paidbah ha Umsawli. U Sukhchain Singh na ka SSCB bad u Paras Hooda na Haryana ki la pyndep ha ka kyrdan ba san bad ba hynriew, ha kaba baroh arngut ki la kamai 672 point.
Ha ka wat ïaknieh rung Recurve jong ki kynthei, ka Kumkum Anil Mohod jong ka Maharashtra ka la lamkhmat ïa ka miej jingkheiñ da kaba kamai 677 poiñ, kaba ïapher da 15 poiñ ïa ka Ankita Bhakat ka Jharkhand kaba la kamai 662 poiñ. Nangta ka Sangeeta jong ka SSCB ka la bud ha ka kyrdan ba lai da 660 point.
Ka Sharvari Somnath Shende bad ka Gatha Anandrao Khadake jong ka Maharashtra ki la kam ïa ka kyrdan ba saw bad ba san, ha kaba baroh arngut ki la kamai 657 point, kaba pynlong ïa kane ka jylla ba bat lai tylli ki kyrdan ha ka thup Top-5. Ka Bhagora Bhargavi Vargishkumar jong ka Gujarat ka la pyndep ha ka kyrdan ba hynriew da 655 point.
La sdang ïa ka lympung da ka jingïakhun ïaknieh rung ha ka Recurve kaba 70 mitar jong ki shynrang bad kynthei, bud sa ka jingïalang plie pyrda, bad la pynkut ïa ka sngi da ka jingïakhun ïaknieh rung kaba ar ha ka Recurve jong ki kynthei kaba 70 mitar.
Ka jingïakhun Recurve jong ki kynhun na ka bynta ki shynrang bad kynthei ha ka 1/8 bad ka Quarter-final kan long ha ka 16 tarik.