Shillong, Naiwieng 11 : Ka nongbah Shillong hynne ka sngi Balang ka la sakhi ïa ka jingkylla kynsan ka suiñbneng hadien ba u phria ryngkat bad u slap uba jur ki la khyrwit kynsan kylleng ki bynta jong ka nongbah kaba la pynlong ïa ki surok bad ki phyllaw iing briew ban lieh kumba hap ka ïor.
Kane ka jinghap phria ka la jia hapdeng ka por kumba 11:00 baje mynstep hadien ba u lyoh ba dum u la tap ïa ka nongbah bad hadien kane bud sa ka jinghap slap bad u phria uba jur.
Watla ka jingther jong u phria bad u slap ki neh tang katto katne por hynrei la sakhi pat ïa ka jinglang bad shlei um ha ki katto katne ki jaka kaba la pynlong ruh ïa ki surok, ki lynti ïaid kjat, ki jaka paidbah bad ki tnum kali ba pynïeng harud surok ban shah tap lut ha u phria.
Don ki jaka ba rud surok ki la lang thup da u phrïa haduh ba ki nongleit nongwan bad ki nongïaid lynti ba kin ieng shiphang bad shondur.
Bun ki nongshong shnong ki la ring dur bad shon video ïa kane ka jingkylla kynsan ka suinbneng kaba la ktah jur pat ïa ka jingkhriat jong ka nongbah ha ka por ba kan pdiang artad ïa ka aiom tlang.
