Ha ka 4 tarik Nohprah yn pynlong ‘General Meeting’ ka AJMDMWU ha shnong Mynsngat

Jowai, Naiwieng 10: Ki nongshet ja sngi ha ki skul PM-POSHAN hapoh ka lama jong ka All Jaiñtia Midday Meal Worker Union (AJMDMWU) mynta ka sngi 10 tarik u Naiwieng, 2026 kila lum ïa ka jingïalang ha Dorbar Shnong Dulong Community Hall Jowai, naka bynta ban ïakren sani bha halor ki kam ka Union kiba ïadei bad ka bainong ne ka jingai sngewbah (honorarium) jong ka sorkar.
“Ka mat jingdawa jong ka seng ka long ban pynkiew noh ïa ka bainong (honorarium) na ka Rs.900 tyngka sha ka Rs.9000 hajar tyngka haka shibnai na ka bhah jong ka sorkar kmie. Kumba long mynta ka sorkar jylla lyngba u Conrad K. Sangma kala pynkiew na ka 100 tyngka sha ka 1100 shibnai”.
Hadien ka jingïalang naka liang u Adviser ka seng u ma Khroo. L. Pariat ula ong ka seng ha ryngkat ka jingïatreilang bad ka Union of Cook cum Helpers PM POSHAN Meghalaya kiba buh ka jingkyrpad ïa u Myntri Rangbah duh ka Ri u Narendra Modi ban pynkiew noh ïa kane bainong na ka bhah jong ka sorkar India.
Ha kine ki sngi bala dep ula ong naduh u Myntri Rangbah ka Jylla u Conrad K. Sangma, u Myntri ba dei peit ïa ka tnad pule puthi u ma Lahkmen Rymbui bad u MP ka Rajya Sabha u James P.K Sangma kila phah ïa ka jingthoh sha u Pralhad Venkatesh Joshi uba dei u Myntri jong ka sorkar kmie ban pynkiew ïa ka bainong jong ki nongshet ja sngi haki skul.
Halor kane ka seng kala ïoh jingthoh na u bah A.L Hek kum u MLA ula dep ban thoh sha ka sorkar India halor kane ka jingdawa, naka liang u Myntri Rangbah ka Assam u Himanta Biswa Sarma ula ai ruh ka jingïaroh ïa kane ka seng napoh ka jylla kaba la shim khia ïa kane ka kam ban dawa na ka sorkar kmie bad kala dei ka por ban pyntreikam noh ïa ka PM POSHAN skim bad kane kala ai mynsiem shi katdei eh ïa ka seng, ong u ma Pariat
Ka seng ka don ka jingkyrmen skem ba u Myntri Rangbah ka Ri lyngba ka Union Cabinet jong u kan sngap ïa kane ka jingdawa nalor ka jingkyrpad lang ki Myntri sorkar na kylleng ki jylla
Shuh shuh ula ong lyngba ka jingpyntrei ïa kane ka skim PM POSHAN kan long ka jingmyntoi ïa baroh ki nongtrei bylla shet ja sngi ha ki skul kiba don kylleng ka Ri bad ki khynnah ruh kin poi beit beit sha ki skul, ula ong ba kane ka skim jong ka sorkar lah ban pyntreikam ïaka haduh ki Secondary bad ki 10+2.
U ma Pariat ula pyntip ba ka seng (AJMDMWU) ha kane ka 4 tarik u Nohprah, 2026 kan don ka ‘General Meeting’ ne ka jingïakynduh lang jong baroh ki nongshet ja skul kiba don na Jaiñtia, Khasi bad na Garo bad la kyntu ba kin ïapoi sha kane ka jingïalang ka ban long haka shnong Mynsngat West Jaiñtia Hills ban ïakren sani ïa ka jingbha jingmiat jong ka seng.