Slem ban pynlait ïa ka pisa MGNREGS bad thud ka bording ha Ri Bhoi pynsngew ka SRS sha u Conrad

Nongpoh, Naiwieng 10: Ka Synjuk ki Rangbah Shnong Ri-Bhoi District haka jingïalang ki dkhot ka Executive Committee mynta ka sngi kila rai ban leit kynduh syndon ïa u Myntri Rangbah ka jylla haba ïadei bad ki jingeh ba ki shnong ki mad haka thaiñ Ri-Bhoi.
Haba kren sha ki lad pathai khubor, naka liang u Bah PB Sylliang Secretary ka Synjuk ki Rangbah Shnong Ri-Bhoi District haka jingdonlang u Bah BB Makdoh Chairman bad ki dkhot u la ong ba naka liang ka Synjuk kala pynpaw ka jingsngewkhia haba ïadei bad ka jingeh jong ki shnong kiba pyntrei ïaka skhim bylla 100 sngi ne ka MGNREGS namar ka jingbym pynlait pisa ka sorkar haba ïadei bad ki material bill bad bun naki dukan ba ki shnong ki shim ïaki tiar ki tar kila ud la nam, bad haka jingshisha kine ki bnai la dei ba ka sorkar kan pynlait noh ïaka pisa hynrei haduh mynta ym pat ioh, khamtam bun naki VEC mynta kila pyntreikam ïaka VB-G RAM G bad kaba ma ka long ba hadien bala pyntreikam ïa kane, ka bill barim kin nym ioh shuh bad kum ka kynhun ki Rangbah Shnong kila rai ban pynsngew beit ïa kane ka jingeh hakhmat u Myntri Rangbah.
Ka mat kaba ar kaba la ioh ban ïakren ka dei halor ka jingthud palat ka bording elektrik ha Ri-Bhoi bad katkum ka jingioh jingtip, ka MeECL lyngba kawei ka agency kala dep ban khot iaka jingthungkam naka bynta ki lineman ha Ri-Bhoi District, bad kumba la ioh jingtip ki don haduh 23 ngut ki lineman ki dei na Ri-Bhoi District, hynrei kaba sngewsih ka long ba kine ki briew kim shym la shah kynthup ha kata ka agency bad naka liang ka Synjuk kala pyrshang ban ïakren bad u trai katei ka agency ban kynthup ia kine ki briew, bad ki don ruh ki casual kiba la trei bad tip bha ïa kane ka kam kila shah weng kam bad ka synjuk kan sa shimkhia ban ïakren halor kane ka kam.
Shuh shuh ka Synjuk kala ioh ruh ban ïakren halor ka ka jingpynbha shuh shuh ha kaba ïadei bad ka jingjied bad shimbynta ban jied ïa u syiem ka Hima Mylliem ha kaba ka synjuk kan sa leit ban kynduh ïa u CEM ka District Council ban pynbha shuh shuh ha kaba ïadei bad ka jingjied ïa u syiem ka Hima Mylliem bad kyrmen ba kine ki kam kin urlong na ka bynta ka jingbit jingbiang lang jong baroh.