Shillong, Naiwieng 09: Ka Mawpat ka la shah tam ar kol hynrei ka la jubab da kaba pynkhihjar ar sien ban ïakhaid da mar 2-2 kol bad ka Mawpdang ha ka jingïakhun jong ka Group A ha ka lympung SSA Champions Cup 2026 ha SSA Stadium hynne ka sngi Nyngkong.
Ha kane ka jingïakhun kaba itynnad la sakhi ïa u Donlad Diengdoh (1’, 13’) uba la pynkhihjar ar sien ban ai ïa ka Mawpdang ïa ka jingsdang kaba kim shym la mutdur hashwa ba ka Mawpat kan pynphai kawei ka kol shuwa ban jam sha por shongthait lyngba u Dajiedlang Wanshnong (45’) bad nangta u Donboklang Lyngdoh (59’) ula thep ïa ka kol kaba la pynïakhaid ha ka kylla miet.
Kane ka dei ka jingïakhun ba nyngkong jong ka Mawpdang ha kane ka lympung bad ka dei ka jingïalehkai ba nyngkong jong ki ha ka lympung jong ka SSA naduh ba ki la jop ïa ka U-20 Fourth Division ha u bnai Naitung. U Donlad u dei uwei na ki rangïalehkai ba ka la shim wai na ka bynta kane ka lympung, bad u la wanrah ka jingktah kaba mardor ha madan.
Ha kawei ka liang ka Mawpat kaba dei ka lahduh ha ka Second Division, ka ïakhun ïa ka jingïalehkai kaba ar hadien ba ka la lah ban pynliem ïa ka Nongkrem ha ka taïew ba la dep. Ha katei ka jingïalehkai ruh ka la shah lamkhmat shuwa ban jop da 2-1, hynrei ha kane ka kynti kim shym la lah ban thep ïa ka namtam ban jop.
U Donlad u la pynkhihwin ïa ka jingïakhun da kaba pynkhihjar tang hadien 3 minit ba la sdang ka jingïalehkai ban pynkmen ïa u paid nongkyrshan jong ka Mawpdang. Ka kol kaba ar ka la bud tang hadien ba u Jonathan Kharbani u la knieh ïa ka bol na u Terry Khongsti ka Mawpat bad nangta u la pashat ïa ka bol na ka liang kamon. U Donlad u la kynthih shajrong ban pynïasoh tiak da ka khlieh ïa ka bol bad pynrung jlang sha kol.
Na ka liang jong ka Mawpat ruh kam shym la shong kli kti hynrei ka la ïakhun tyngeh ban wanphai biang, bad ka jingtrei shitom ka la seisoh ha ka minit shuwa ban jam sha ka por shongthait. Kane ka kol ka la urlong hadien ba u Dajied bad u Embhahlang ki la lymbup paramet katba ki dang pyrshang ban mareh sha ka bol kaba la tyllun sar shapoh kol.
Kiba bun naki kabu thep kol ha ka kylla miet ki dei jong ka Mawpat bad ki la ïoh ban pynïakhaid tang hapoh shi kynta jong ka por ïalehkai hadien ba u Donboklang u la shim kabu ïa ka jingbakla ki rangïalehkai ba shadien jong ka liang pyrshah ban thep ïa ka kol.
Ka jingïakhun ha kane ka sngi Ba-ar yn sakhi ïa ka jingïakhun jong ka Group A hapdeng ka Lamlynti pyrshah ïa ka Nongkrem ha ka por 2:30 baje nohphai sngi. Ka Lamlynti ka la mad ïa ka namrem ha ka jingïalehkai ba nyngkong jong ka da 3-0 ha ka Mawlai, katba ka Nongkrem ka la shah pynliem da 2-1 ha ka Mawpat.
