Shillong, Naiwieng 08 : Ka kynhun ki nongdie madan ha Jail Road ha ka Sngi Saitjaiñ ki la pynpaw ba kin ai lang ka jingkyrshan borbah ïa ka Joint Action Committee (JAC) kaba ïakhun pyrshah ïa ka projek ropeway bakan ïaid shakhmat.
Na ka liang ka President jong ka Association, ka Kong Clarisa Sohtun ka la ong ba ki nongdie madan ha katei ka jaka ki ai lang ka jingkyrshan ïa ka JAC ha kane ka jingïakhun ban ïada ïa ka mariang khamtam eh ïa ki tyllong umdih ha u Lum Shyllong.
Related Posts
“Ngi la wan ban pynpaw ïa ka jingkyrshan ïa ka JAC. Ngi ai ka jingkyrshan kaba pura ïa ka JAC namar ngi kwah ban pynneh ïa ka mariang,” ong ka Kong Sohtun da kaba bynrap ba kane ka jingkyrshan jong ki ka long ruh ban kyrshan lang ïa kito kiba ïakhun pyrshah ïa ka projek ropeway.
“Kum ka kmie, nga ïeng ban kyrshan ïa ki para longkmie kiba ïakhun ban ïada ïa ka mariang bad ïa ki tyllong umdih. Lada ki tyllong um ki shah ktah, kaei kan jia ïa ki khun jong ngi ha ki sngi ban wan?” ka la kylli.