U Bah Paul Lyngdoh u dei ban hiar shuki lada ka sorkar kam pynkynriah ïa ka Ropeway Project

Shillong, Naiwieng 08: Ka Joint Action Committee (JAC) ba pyrshah ïa ka Shillong Ropeway Project ha ka sngi Saitjain, kala dawa ba u Myntri ki kam jngohkai pyrthei u bah Paul Lyngdoh u dei ban hiar shuki noh la daka Sorkar kam lah ban pynkynriah ïa ka ropeway project na Lum Shyllong.

Haba kren sha ki lad pathai khubor ha ka sngi ba-ar jongka jingïashong kyllain mungor, ka dkhot jong ka Executive Member ka JAC Kong Anita Kharmawphlang kala ong ba ka jingïakhih kan ïai bteng tad haduh ba ka Sorkar ka long kaba kloi ban pynkynriah ïa ka project sha kiwei pat ki jaka.

“Phi dei ban pynkynriah ïa ka ropeway lane phin pynbor ïa ngi ban dawa ba u Myntri kam Jngohkai u dei ban hiar shuki” ong ka kong Kharmawphlang.

Ka ïathuh ba bun ki riew tynmen ba hapdeng 60,70 bad 80 snem kila wan ïa shim bynta ha kane ka jingïakhih bad kyntait ban leit shala ïing wat hapdeng ki jingpyrshah ki khun ki kti.

“Watla ki khun jong ki, kim shym la shah ïa ki ban ïashong kyllain mungor hangne, kila rai kut ba kin ym leit phai shala ïing.Lada jia eiei ïa ki, ka Sorkar kan hap ban shim ïa ka jingkitkhlieh, kan hap ban pyrkhat bha ïa kaei ka ban jia ïa ki” kala ong.

Halor ka jingsahmiet, ka kong Kharmawphlang kala ong ba ka Committee kan sa pyntip lyngba ki lad pathai khubor, bad ki briew na kiwei ki shnong kin sa pynbeit ïa ka jingsahmiet kat kaba ki sngewmon.

“Lada ki briew ka Sorkar ki don kmie, ki dei ban pyrkhat bha” kala ong haba kynnoh ïa ka Sorkar ïa ka jingsngap jar jar naba ym shym la don mano mano ruh ban wan shakhmat ban ai jubab ïa ki jingdawa jong ki.

Kala ong “haduh mynta, ka Sorkar ka la sngap jar jar, kam pat ai jubab, ym pat don mano mano ruh kiba wan shakhmat” kala ong bad bynrap “U Myntri kam jngohkai ula leit shabar ri, kata ruh da ka pisa u paidbah”.

Haba pynpaw ba ki nongiakhih kin ym kynran dien, ka kong Kharmawphlang kala ong “Ngi ruh ngi ieng skhem ha ka nongrim ba ngin pyniaid beit shakhmat, ngin ym sangeh, ngin aiti wat ïala ka jingim, ngin ym kynran dien da lei lei ruh”.

“Ngi dawa ïa ka Sorkar ban pynkynriah ïa ka ropeway sha kiwei pat ki jylla, ym ha Lum Shyllong.Kila jied ïa ka jaka kaba bakla” kala ong.