Jowai, Naiwieng 08: Ka Byndihati CSC ka la pynthikna ïa la ka jong ka jaka ha ka phainal jong ka lympung Super Division hadien ba ka la pynliem noh ïa ka Diengshynrum SC ha ka semi final ha ka sngi Saitjaiñ jong ka taïew.
Kane ka lympung kyrdan Super Division kaba la tip ruh kum ka 6th Kyrmen Shylla Contribution Trophy League Stage, la pynïaid da ka East Jaiñtia Hills District Football Association (EJHDFA).
Ka Byndihati CSC ka la lah ba kan pynliem noh ïa ka Diengshynrum da 1-0 kol ban pynskhem ïa ka jaka jong ka ha ka phainal.
Related Posts
Ka jingïakhun kala long kaba itynnad bad kaba ïakhaid bha, hynrei ka shi kol jong ka Byndihati CSC ba la thep da u Lengungin Hansing haka minit kaba 18, ka la long ka jingïapher kaba la pynïakhlad ïa kine ki arliang mamla.
Na ka liang jong ka Diengshynrum SC ka la pyrshang bad ïakhun tyngeh ban pynphai ïa katei ka shikol, hynrei haduh ba kut jong ka jingïakhun ka Byndihati CSC ka pynskhem triang shadien ban khanglad ïa ka liang pyrshah bad jop ïa ka semi final da 1-0 kol.
Ha kaba kut jong ka jingïakhun u Thinkwell Bareh jong ka Byndihati CSC u la khur ïa ka khusnam Player of the Match.
Da kane ka jingjop ka Byndihati CSC, kala ïoh ban rung syndon sha ka phainal ha kane ka lympung Super Division jong ka EJHDFA.