Tura, Naiwieng 7: Ka kynhun ki nongrep jong ka Sadolpara Farmers’ Group, West Garo Hills ha Meghalaya ki la shah jied na ka bynta ka khusnam jong ka Plant Genome Savior Community (PGSC) Award na ka bynta u snem 2023-24 kum ka jingithuh ïa ka jingpyrshang jong ka ban pynneh pynsah ïa u Comilla cotton uba duna bad uba la jan duh jait bad u jait jingthung tynrai.
Kane ka khusnam, kaba la seng da ka Protection of Plant Varieties and Farmers’ Rights Authority (PPVFRA) hapoh ka Union Ministry of Agriculture and Farmers’ Welfare, ka don ïa ka khusnam pisa kaba 10 lak, ryngkat bad ka jingai burom bad ka momento ban sah kynmaw.
Ki dkhot jong ka kynhun ki nongrep kin leit sha New Delhi ha ka 12 tarik u Naiwieng ban pdiang ïa kane ka khusnam ha ka jingïalang ba la pynlong da ka PPVFRA.
Kane ka kynhun, kaba don ha ka shnong Sadolpara kaba don hapoh ka Dadenggre block jong ka West Garo Hills, ka la ïoh ïa ka jingithuh na ka bynta ka jingpyrshang ba ïai bteng jong ka ban pynneh pynsah ïa u Comilla cotton (Gossypium arboreum L. race cernuum), une jait uba duna bha bad uba la khang pyrshah.
Nalor u Comilla cotton, ka kynhun ka la noh synniang ruh ban pynneh pynsah ïa ki katto katne ki jait jingthung tynrai, kaba ïarap ban ïada ïa ki jingthaw ba im ha ka rep ka riang jong ka thaiñ bad ka jingstad rep tynrai.
Ïa kane ka application na ka bynta ka khusnam la pynsuk da ka Central Agricultural University (CAU), Imphal, hapoh ka jingïalam jong u Vice-Chancellor jong ka, u Dr Anupam Mishra.
Ka Dr Jyoti V. Vastrad, Dean jong ka College of Community Science, CAU (Imphal), Tura, bad Dr H. G. Kencharaddi, Assistant Professor halor ka Genetics bad Plant Breeding, kila leh ïa ka bynta ba kongsan.
U Dr Kencharaddi mynshwa u la don bynta bad ka MTTC bad ka VTC ha ka College of Community Science, Tura, bad mynta u dang trei ha ka College of Agriculture, CAU (Imphal), Kyrdemkulai, Meghalaya.
Ka jingkyrshan jong ka skul bah ka la iarap ban pynpaw ïa ka jingdonkam jong u Comilla cotton bad ka jingnoh synniang jong ka imlang sahlang ban pynneh pynsah ia ki marpoh.
Ïa kane ka jingithuh la shim kum ka jingjop kaba kongsan na ka bynta ka Meghalaya, ka Garo Hills bad ka thain North Eastern Hill, kaba pynpaw ia ka bynta jong ki jaitbynriew trai ri trai muluk ha kaba iada ïa ki jingthaw ba im ha ka rep ka riang jong ka ri India.
