Ïaid ka jingïakhih ka JAC bad ki longkmie ha ka sngi kaba ar, lah nangbun kiba wan ai jingkyrshan

Shillong, Naiwieng 07: Ka jingïakynad hapdeng ka sorkar jylla bad ka Joint Action Committee (JAC) kaba la thaw ban pyrshah ïa ka projek Shillong Peak Ropeway kam pyni dak eiei ban kut noh, ha kaba baroh ar liang ki ïai bat beit ha la ki jong ki nongrim.
Kane ka jingïakhih shong kyllaiñ myngor jong ka JAC kaba la shim bynta lang ruh da kiwei pat ki longkmie kiba sngewkhia nangta ka jingwan ban ïatuid jong kiba bun ki nongshong shnong ban wan ai ki jingkyrshan ka la long mynta ha ka sngi kaba ar naduh ba la sdang ha ka sngi Thohdieng.
Kine ki longkmie kiba la ïakhih hapoh ka jingïalam jong ka JAC ha ka miet sngi Thohdieng ki la wanrah ruh da ki mattress bad ki jaiñkup nangta ruh ban shna da ki tent hapoh ka jaka ba pynïeng ïa u mot jong u Woh Kiang Nangbah kaba don ha Barik marpyrshah jong ka Civil Hospital bad kane ka jingïakhih jong ki, kumba long mynta ka dang ïaibteng ha katei ka jaka.
Lah ban pynkynmaw ba hadien ka jingpynpaw ha ka sngi Palei da ka sorkar Meghalaya ba kan ïaid shakhmat ïa kane ka projek, ka JAC naduh ka sngi Thohdieng hadien ba ka la sdang ïa ka jingïakhih shong kyllaiñ myngor ka la bat skhem ïa ka jingpyrshah jong ki ïa ka, da kaba khot ban pynkynriah noh ïa ka projek shawei pat kaba jngai na Shillong Peak.
Ka JAC ka la sdang ïa ka jingshong shong kyllaiñ myngor bad rah ruh da ki placard ba thoh bun ki jingpyrshah shngaiñ bad kane kadei kaba khlem buh por ha u mot jong U Kiang Nangbah kaba don hajan Shillong Civil Hospital naduh ka sngi Thohdieng bad kaba la bteng biang ha ka sngi Saitjaiñ.
Kane ka jingshong kyllaiñ myngor ka la ïoh jingbit na ki bor pynïaid ka East Khasi Hills hynrei tang haduh ka por 4 baje janmiet, hynrei ha ka miet pat jong ka sngi Thohdieng hadien ba u DC ka East Khasi Hills u la leit jngoh hi dalade ïa katei ka jaka u la bthah ïa ki longkmie ban sangeh bad ban bteng biang ha ka sngi ba bud. Ka JAC ka la batai ba kam dei ka jingsdang jong ka jingïakhih hynrei kum ka jingpynkynmaw ba ka komiti ka la ïai bteng naduh ba kane ka mat ka la mih nyngkong.
Ki longkmie ki la ong ba kin aiti ïa la ka jong ka jingim hynrei kin nym ailad ba kane ka projek kan ïaid shakhmat bad ba ka sorkar kan hap ban pyndam noh ïa kane ka projek lane ban pynkynriah noh sha kawei pat ka jaka. Ki pyrshah jur ïa ka Ropeway Project namar ki ngeit ba kan ktah ïa ki tyllong um kiba shakri ym tang ïa ka Greater Laban hynrei ïa ka bynta kaba heh jong ka nongbah Shillong.
Ka JAC ka la kyntu ruh ia ki 7 ngut ki Rangbah Shnong kiba hap hapoh ka Riat Laban Dorbar Pyllun ba kin weng noh ïa ka jingïateh ba la ïasoi bad ka sorkar.
Ka JAC ka la ïoh ïa ka jingkyrshan na ka Green-Tech Foundation (GTF), kaba la lamkhmat ia ka jingpyrshah ia ka projek jong ka jaka jngohkai pyrthei ha Lumpongdeng, na kaba ka sorkar ka la kiew noh ha kaba sdang jong une u snem.